ਫਿਲੌਰ, 3 ਦਸੰਬਰ (ਵਿਪਨ ਗੈਰੀ)-ਬੀਤੀ ਸ਼ਾਮ 13 ਸਾਲਾਂ ਦੇ ਇਕਲੌਤੇ ਪੁੱਤ ਨੂੰ ਛੱਡ ਇੱਕ ਗਰੀਬ ਬੇਸਹਾਰਾ ਮਾਂ ਨੇ ਇਸ ਫਾਨੀ ਸੰਸਾਰ ਨੂੰ ਅਲਵਿਦਾ ਆਖ ਦਿੱਤਾ ਤੇ ਉਸ ਦੀ ਮੌਤ ਨੂੰ ਇਲਾਕੇ ਦੇ ਲੋਕ ਹਾਦਸੇ ਦੀ ਮੌਤ ਨਹੀਂ ਬਲਕਿ ਇੱਕ ਕਤਲ ਮੰਨ ਰਹੇ ਹਨ | ਦੱਸਣਯੋਗ ਹੈ ਕੀ ਫਿਲੌਰ ਤੋਂ ਨਗਰ, ਨਵਾਂ ਸ਼ਹਿਰ, ਰੋਪੜ ਅਤੇ ਅਨੰਦਪੁਰ ਸਾਹਿਬ ਵੱਲ ਜਾਂਦੀ ਸੜਕ 'ਤੇ ਇੱਕ ਟਰੱਕ ਵਲ਼ੋਂ ਮਾਰੀ ਟੱਕਰ ਨਾਲ 40 ਸਾਲਾਂ ਔਰਤ ਦੀ ਮੌਕੇ 'ਤੇ ਮੌਤ ਹੋ ਗਈ ਸੀ ਜਿਸ ਮਗਰੋਂ ਲੋਕਾਂ ਨੇ ਸੜਕ 'ਤੇ ਔਰਤ ਦੀ ਲਾਸ਼ ਰੱਖ ਕੇ ਰੋਡ ਨੂੰ ਮੁਕੰਮਲ ਤੌਰ 'ਤੇ ਬੰਦ ਕਰ ਦਿੱਤਾ | ਜਿਸ ਮਗਰੋਂ ਪ੍ਰਸ਼ਾਸਨ ਨੇ ਪਹੁੰਚ ਕੇ ਲੋਕਾਂ ਨੂੰ ਸ਼ਾਂਤ ਕਰਵਾਇਆ ਸੀ ਤੇ ਅੱਜ ਫਿਰ ਉਸੇ ਸਥਾਨ 'ਤੇ ਪਿੰਡ ਨਗਰ ਦੇ ਲੋਕਾਂ ਨੇ ਇੱਕ ਵਾਰ ਫਿਰ ਰੋਡ ਨੂੰ ਬੰਦ ਕਰ ਦਿੱਤਾ ਤੇ ਮੰਗ ਰੱਖੀ ਕਿ ਹੁਣ ਉਹ ਕਿਸੇ ਹੋਰ ਮਾਂ ਦੀ ਬਲੀ ਨਹੀਂ ਚੜ੍ਹਨ ਦੇਣਗੇ ਤੇ ਜਦ ਤੱਕ ਉਨ੍ਹਾਂ ਦੀ ਸਮੱਸਿਆ ਦਾ ਹੱਲ ਨਹੀ ਹੁੰਦਾ, ਤੇ ਅੱਜ ਇੱਕ ਔਰਤ ਦੀ ਮੌਤ ਮਗਰੋਂ ਨੀਂਦ ਵਿਚੋਂ ਜਾਗੇ ਪ੍ਰਸ਼ਾਸਨ ਨੇ ਪਾਣੀ ਦੇ ਨਿਕਾਸ ਦਾ ਕੰਮ ਸ਼ੁਰੂ ਕਰਵਾ ਕੇ ਧਰਨਾ ਸ਼ਾਮ 5 ਵਜੇ ਦੇ ਕਰੀਬ ਚੁਕਵਾ ਦਿੱਤਾ | ਜਦ ਕੀ ਰੋਡ ਬੰਦ ਹੋਣ ਕਾਰਨ ਹਜ਼ਾਰਾਂ ਰਾਹਗੀਰਾਂ ਨੂੰ ਵੱਡੀ ਮੁਸ਼ਕਲਾਂ ਦਾ ਸਾਹਮਣਾ ਵੀ ਕਰਨਾ ਪਿਆ ਅਤੇ ਦੂਰ-ਦੁਰਾਢੇ ਜਾਣ ਵਾਲੇ ਲੋਕ ਅਣਜਾਣ ਰਾਹਾਂ ਵਿਚ ਖੱਜਲ ਹੁੰਦੇ ਰਹੇ |
