ਹੰਡਿਆਇਆ, 2 ਸਤੰਬਰ (ਗੁਰਜੀਤ ਸਿੰਘ ਖੁੱਡੀ)-ਹੰਡਿਆਇਆ ਦੇ ਵਾਰਡ ਨੰਬਰ 10 ਅਤੇ 11 ਵਿਚ ਪਿਛਲੇ ਦਿਨਾਂ ਤੋਂ ਲਗਾਤਾਰ ਪੈ ਰਹੇ ਨਾਲੀ ਦੇ ਗੰਦਾ ਪਾਣੀ ਅਤੇ ਸੀਵਰੇਜ ਪਾਈਪ ਦਾ ਪਾਣੀ ਵਿਚ ਪੈਣ ਕਰ ਕੇ ਗਲੀ ਹੇਠਾਂ ਧਸ ਗਈ ਹੈ | ਜਿਸ ਨਾਲ ਕਈ ਘਰਾਂ ਵਿਚ ਤਰੇੜਾਂ ਪੈਣ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਵਾਸੀਆਂ ਜੱਗੀ ਖ਼ਾਨ, ਮੋਠਾ ਖ਼ਾਨ, ਸਾਬਰ ਖ਼ਾਨ, ਸੇਵਕ ਕੁਮਾਰ, ਬਾਲਾ ਕੁਮਾਰ, ਹਨੀ ਖ਼ਾਨ, ਬੱਗਾ ਖ਼ਾਨ, ਸੀਰਾ ਸਿੰਘ, ਸਰਨੋ ਬੇਗ਼ਮ, ਪ੍ਰਵੀਨ, ਅਨੰਦ ਕੁਮਾਰ ਤਿ੍ਪਾਠੀ ਨੇ ਕਿਹਾ ਕਿ ਮੀਂਹ ਕਾਰਨ ਅਤੇ ਸੀਵਰੇਜ ਦਾ ਪਾਣੀ ਘਰ 'ਚ ਪੈਣ ਕਾਰਨ ਨੀਂਹਾਂ ਦਬ ਗਈਆਂ ਸਨ | ਜਿਸ ਕਰ ਕੇ ਇਕ ਘਰ ਡਿੱਗ ਗਿਆ ਅਤੇ ਬਾਕੀ ਘਰਾਂ ਵਿਚ ਤਰੇੜਾਂ ਪੈ ਗਈਆਂ ਹਨ ਜਿਸ ਨਾਲ ਕਿਸੇ ਸਮੇਂ ਵੀ ਕੋਈ ਵੱਡਾ ਹਾਦਸਾ ਵਾਪਰ ਸਕਦਾ ਹੈ | ਅਸੀਂ ਸਾਰੇ ਰਲ ਕੇ ਗਲੀ ਵਿਚ ਪਲਾਸਟਿਕ ਦਾ ਕਾਗ਼ਜ਼ ਪਾ ਕੇ ਬਚਾਅ ਕਰ ਰਹੇ ਹਾਂ | ਉਨ੍ਹਾਂ ਪੰਜਾਬ ਸਰਕਾਰ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਤੋਂ ਆਰਥਿਕ ਮਦਦ ਦੀ ਮੰਗ ਕੀਤੀ | ਜਦੋਂ ਇਸ ਸਬੰਧੀ ਵਾਟਰ ਸਪਲਾਈ ਤੇ ਸੀਵਰੇਜ ਬਰਨਾਲਾ ਦੇ ਐਸ.ਡੀ.ਓ ਪਰਮਿੰਦਰ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਮੁਲਾਜ਼ਮ ਲਾ ਕੇ ਮਸਲਾ ਹੱਲ ਕਰਵਾਇਆ ਜਾਵੇਗਾ |
