-ਸੰਘਣੀ ਧੁੰਦ ਕਾਰਨ ਦੋਰਾਹਾ ਵਿਖੇ ਵਾਪਰਿਆ ਭਿਆਨਕ ਸੜਕ ਹਾਦਸਾ-<br> ਕਈ ਵਾਹਨ ਆਪਸ ਵਿਚ ਟਕਰਾਏ, ਹਾਦਸੇ 'ਚ ਇਕ ਦੀ ਮੌਤ

ਦੋਰਾਹਾ, 28 ਦਸੰਬਰ (ਮਨਜੀਤ ਸਿੰਘ ਗਿੱਲ)-ਦੋਰਾਹਾ ਲਾਗੇ ਦੱਖਣੀ ਬਾਈਪਾਸ ਰੋਡ 'ਤੇ ਅਜਨੋਦ ਪਿੰਡ ਦੇ ਪੁਲ ਨੇੜੇ ਸੰਘਣੀ ਧੁੰਦ ਕਾਰਨ ਪੰਜ ਵਾਹਨ ਆਪਸ ਵਿਚ ਟਕਰਾ ਗਏ | ਇਸ ਹਾਦਸੇ ਵਿਚ ਇਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਚਾਰ ਤੋਂ ਪੰਜ ਲੋਕ ਜ਼ਖਮੀ ਹੋ ਗਏ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਜਨੋਦ ਪਿੰਡ ਨੇੜੇ ਧੁੰਦ ਕਾਰਨ ਇੱਕ ਆਟੋਰਿਕਸ਼ਾ ਅਤੇ ਇਕ ਮੋਟਰਸਾਈਕਲ ਦੀ ਟੱਕਰ ਹੋ ਗਈ | ਓਥੇ ਹੀ ਘਰੇਲੂ ਗੈਸ ਸਿਲੰਡਰਾਂ ਵਾਲਾ ਇੱਕ ਟਰੱਕ ਪਿੱਛੇ ਤੋਂ ਆ ਰਿਹਾ ਸੀ | ਹਾਦਸੇ ਨੂੰ ਦੇਖ ਕੇ ਟਰੱਕ ਡਰਾਈਵਰ ਨੇ ਅਚਾਨਕ ਬ੍ਰੇਕ ਲਗਾਈ, ਜਿਸ ਕਾਰਨ ਇੱਕ ਕਾਰ ਉਸ ਨਾਲ ਟਕਰਾ ਗਈ ਅਤੇ ਪਿੱਛੇ ਤੋਂ ਆ ਰਹੇ ਇੱਕ ਟਰੱਕ ਨੇ ਗੈਸ ਸਿਲੰਡਰ ਨਾਲ ਭਰੇ ਟਰੱਕ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਸਿਲੰਡਰ ਸੜਕ 'ਤੇ ਖਿੱਲਰ ਗਏ | ਇੱਕ ਹੋਰ ਟਰੱਕ, ਜੋ ਟਰੱਕ ਤੋਂ ਬਚਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਸਾਈਡ ਰੇਲਿੰਗ ਨਾਲ ਟਕਰਾ ਗਿਆ ਅਤੇ ਸੜਕ ਕਿਨਾਰੇ ਖੜ੍ਹੇ ਇੱਕ ਵਿਅਕਤੀ ਨੂੰ ਬੁਰੀ ਤਰ੍ਹਾਂ ਕੁਚਲ ਦਿੱਤਾ, ਜਿਸ ਕਾਰਨ ਉਸਦੀ ਮੌਤ ਹੋ ਗਈ | ਹਾਦਸਾ ਵਾਪਰਨ ਕਾਰਨ ਸੜਕ 'ਤੇ ਜਲਦੀ ਹੀ ਟਰੈਫ਼ਿਕ ਜਾਮ ਹੋ ਗਿਆ | ਖ਼ੁਸ਼ਕਿਸਮਤੀ ਨਾਲ, ਇਸ ਘਟਨਾ ਵਿੱਚ ਇੱਕ ਵੱਡਾ ਹਾਦਸਾ ਟਲ ਗਿਆ | ਜੇਕਰ ਗੈਸ ਸਿਲੰਡਰ ਫਟ ਜਾਂਦੇ ਤਾਂ ਇੱਕ ਵੱਡਾ ਹਾਦਸਾ ਵਾਪਰ ਸਕਦਾ ਸੀ | ਐਸ. ਐਸ. ਐਫ ਟੀਮ ਅਤੇ ਦੋਰਾਹਾ ਪੁਲਿਸ ਸਟੇਸ਼ਨ ਦੇ ਐਸ. ਐਚ. ਓ ਆਕਾਸ਼ ਦੱਤ ਪੁਲਿਸ ਪਾਰਟੀ ਸਮੇਤ ਮੌਕੇ 'ਤੇ ਪਹੁੰਚੇ ਅਤੇ ਸਥਿਤੀ ਨੂੰ ਕਾਬੂ ਕੀਤਾ | ਪੁਲਿਸ ਨੇ ਦੱਸਿਆ ਕਿ ਮਿ੍ਤਕ ਦਾ ਨਾਮ ਬਾਰਾ ਸਿੰਘ ਹੈ, ਜੋ ਪਿੰਡ ਗੁਰਥਲੀ ਦਾ ਰਹਿਣ ਵਾਲਾ ਹੈ |