ਬਟਾਲਾ, 28 ਦਸੰਬਰ (ਸਤਿੰਦਰ ਸਿੰਘ)- ਦਿਵਿਆ ਜਯੋਤੀ ਜਾਗਿ੍ਤੀ ਸੰਸਥਾਨ ਦੇ ਬਟਾਲਾ ਆਸ਼ਰਮ ਵਿਖੇ ਭੰਡਾਰਾ ਕਰਵਾਇਆ ਗਿਆ ਜਿਸ ਵਿਚ ਸ਼੍ਰੀ ਆਸ਼ੂਤੋਸ਼ ਦੇ ਸ਼ਿਸ਼ਯ ਸਵਾਮੀ ਸੰਗਿਆਮਾਨੰਦ ਨੇ ਸਮਝਾਇਆ ਕਿ ਸਾਡੇ ਸੰਤ ਤੇ ਮਹਾਂਪੁਰਖ ਹਮੇਸ਼ਾ ਸਮਾਜ ਭਲਾਈ ਦੀ ਗੱਲ ਕਰਦੇ ਹਨ | ਉਨ੍ਹਾਂ ਦਾ ਹਰ ਕਦਮ ਸਾਡੇ ਲਈ ਰੌਸ਼ਨੀ ਦੀ ਕਿਰਨ ਹੈ, ਅੱਜ ਚਾਰ ਸਾਹਿਬਜ਼ਾਦਿਆਂ ਦਾ ਸ਼ਹੀਦੀ ਦਿਵਸ ਮਨਾਇਆ ਜਾ ਰਿਹਾ ਹੈ | ਉਨ੍ਹਾਂ ਦੱਸਿਆ ਕਿ ਸ਼ਹਾਦਤ ਸ਼ਬਦ ਫਾਰਸੀ ਭਾਸ਼ਾ ਤੋਂ ਲਿਆ ਗਿਆ ਹੈ ਜਿਸ ਦਾ ਅਰਥ ਹੈ 'ਸੱਚ ਦੀ ਗਵਾਹੀ' | ਸਿਧਾਂਤਾਂ ਦੀ ਸੱਚਾਈ ਲਈ ਆਪਣੇ-ਆਪ ਨੂੰ ਕੁਰਬਾਨ ਕਰਨ ਵਾਲੇ ਵਿਅਕਤੀ ਨੂੰ ਸ਼ਹੀਦ ਕਿਹਾ ਜਾਂਦਾ ਹੈ | ਉਨ੍ਹਾਂ ਕਿਹਾ ਕਿ ਜੇਕਰ ਅਸੀਂ ਸੱਚਮੁੱਚ ਇਸ ਮਨੁੱਖੀ ਸਰੀਰ ਦਾ ਸਤਿਕਾਰ ਕਰਦੇ ਹਾਂ ਤਾਂ ਸਾਨੂੰ ਜੀਵਨ ਦਾ ਅੰਤਿਮ ਟੀਚਾ 'ਪ੍ਰਮਾਤਮਾ' ਨੂੰ ਪ੍ਰਾਪਤ ਕਰਨਾ ਚਾਹੀਦਾ ਹੈ ਪਰ ਦੁੱਖ ਦੀ ਗੱਲ ਹੈ ਕਿ ਮਨੁੱਖਾਂ ਨੇ ਭਰਮ ਦੇ ਜਾਲ ਵਿਚ ਫਸ ਕੇ ਅਣਗਿਣਤ ਮੌਕੇ ਗੁਆ ਦਿੱਤੇ ਹਨ | ਸਿਰਫ਼ ਇਕ ਗੁਰੂ ਹੀ ਸਾਨੂੰ ਉਹ ਰਸਤਾ ਦਿਖਾ ਸਕਦਾ ਹੈ, ਜੋ ਸਾਨੂੰ ਭਰਮ ਦੇ ਬੰਧਨ ਤੋਂ ਮੁਕਤ ਕਰਦਾ ਹੈ ਅਤੇ ਸਾਨੂੰ ਸੱਚੀ ਖੁਸ਼ੀ ਵੱਲ ਲੈ ਜਾਂਦਾ ਹੈ |
