ਨਵਾਂਸ਼ਹਿਰ, 22 ਦਸੰਬਰ (ਜਸਬੀਰ ਸਿੰਘ ਨੂਰਪੁਰ) - ਕੈਨੇਡਾ ਵਿਰੋਧੀ ਧਿਰ ਦੇ ਉਪ ਨੇਤਾ ਟਿੱਮ ਉੱਪਲ ਵੱਲੋਂ ਰੀਮਿਕਸ ਪ੍ਰੈਜ਼ੀਡੈਂਟ ਰੀਅਲ ਅਸਟੇਟ ਕੰਪਨੀ ਦੇ ਮੈਨੇਜਿੰਗ ਡਾਇਰੈਕਟਰ ਗੈਰੀ ਭੌਰਾ ਦਾ ਕੈਨੇਡਾ ਵਿਖੇ ਸਮਾਜ ਸੇਵੀ ਕਾਰਜਾਂ ਵਿੱਚ ਪਾਏ ਜਾ ਰਹੇ ਭਰਪੂਰ ਯੋਗਦਾਨ ਲਈ ਬਰੈਂਪਟਨ ਵਿਖੇ ਕਰਵਾਏ ਸਮਾਗਮ ਦੌਰਾਨ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ | ਕੰਪਨੀ ਵੱਲੋਂ ਕਰਵਾਈ ਸਲਾਨਾ ਸਮਾਗਮ ਨਾਈਟ ਦੌਰਾਨ ਸੰਬੋਧਨ ਕਰਦੇ ਹੋਏ ਟਿੱਮ ਉਪਲ ਨੇ ਕਿਹਾ ਕਿ ਗੈਰੀ ਭੌਰਾ ਦੀ ਅਗਵਾਈ ਦੇ ਹੇਠ ਕੰਪਨੀ ਨੇ ਜਿੱਥੇ ਰੀਅਲ ਅਸਟੇਟ ਖੇਤਰ ਵਿੱਚ ਵੱਖਰਾ ਨਾਮਣਾ ਖੱਟਿਆ ਹੈ, ਉੱਥੇ ਹੀ ਲੋਕ ਭਲਾਈ ਕਾਰਜਾਂ, ਚਾਹੇ ਉਹ ਸਮਾਜਿਕ ਖੇਤਰ ਹੋਵੇ ਚਾਹੇ ਧਾਰਮਿਕ, ਸਭਨਾਂ ਵਿੱਚ ਵਿਸ਼ੇਸ਼ ਯੋਗਦਾਨ ਪਾਇਆ ਹੈ | ਉਹਨਾਂ ਕਿਹਾ ਕਿ ਗੈਰੀ ਭੌਰਾ ਪਹਿਲਾਂ ਟੋਰੰਟੋ ਰੀਅਲ ਅਸਟੇਟ ਬੋਰਡ ਦੇ ਪ੍ਰਧਾਨ ਬਣੇ ਪਰ ਹੁਣ ਉਹਨਾਂ ਵੱਲੋਂ ਕੈਨੇਡਾ ਰੀਅਲ ਅਸਟੇਟ ਬੋਰਡ ਦੇ ਪ੍ਰਧਾਨ ਨਿਯੁਕਤ ਹੋਣ ਨਾਲ ਸਮੁੱਚੇ ਪੰਜਾਬੀ ਭਾਈਚਾਰੇ ਦਾ ਨਾਮ ਉੱਚਾ ਹੋਇਆ ਹੈ | ਇਸ ਮੌਕੇ ਅਮਰਜੀਤ ਗਿੱਲ ਐਮ. ਪੀ, ਜਸਰਾਜ ਹੱਲਣ ਐਮ. ਪੀ., ਅਮਰਜੋਤ ਸਿੰਘ ਸੰਧੂ ਐਮ. ਪੀ., ਅਮਨਦੀਪ ਕੌਰ ਸੋਢੀ ਐਮ. ਪੀ., ਹਰਕੀਰਤ ਸਿੰਘ ਡਿਪਟੀ ਮੇਅਰ ਬਰੈਂਪਟਨ, ਗੁਰਪ੍ਰਤਾਪ ਸਿੰਘ ਤੂਰ ਰਿਜਨਲ ਕੌਂਸਲਰ, ਨਿਰਵੈਰ ਸਿੰਘ ਸੋਤਰਾਂ ਸੀਨੀਅਰ ਆਗੂ ਸ਼੍ਰੋਮਣੀ ਅਕਾਲੀ ਦਲ, ਸੁੱਖ ਭੌਰਾ, ਰਾਜ ਚਾਹਿਲ, ਜਸਪਾਲ ਗਹੂੰਣੀਆਂ, ਲਖਵੀਰ ਸਿੰਘ ਰਾਣੂੰ, ਦਲਵੀਰ ਸਿੰਘ ਥਾਂਦੀ, ਪਵਨ ਜੌਹਲ ਤੇ ਰੀਅਲ ਅਸਟੇਟ ਬਰੋਕਰ ਵੀ ਹਾਜ਼ਰ ਸਨ |
