ਕੋਲਕਾਤਾ, 9 ਅਕਤੂਬਰ (ਪੀ.ਟੀ.ਆਈ.)- ਪੱਛਮੀ ਬੰਗਾਲ ਦੇ ਨੰਦੀਗ੍ਰਾਮ ਵਿਧਾਨ ਸਭਾ ਹਲਕੇ ਦੀ ਜ਼ਿਮਨੀ ਚੋਣ ’ਚ ਭਾਜਪਾ ਦੀ ਉਮੀਦਵਾਰ ਹਸੀਰਾਨੀ ਰਾਠ ਨੇ ਕਾਂਗਰਸ ਦੇ ਆਪਣੇ ਨੇੜਲੇ ਵਿਰੋਧੀ ਮਿਲਨ ਪ੍ਰਧਾਨ ਨੂੰ ਰਿਕਾਰਡ 1,22,753 ਵੋਟਾਂ ਦੇ ਫ਼ਰਕ ਨਾਲ ਹਰਾ ਦਿੱਤਾ ਹੈ। ਮੁੱਖ ਮੰਤਰੀ ਸੁਵੇਂਦੂ ਅਧਿਕਾਰੀ ਦੇ ਮਰਹੂਮ ਨਿੱਜੀ ਸਹਾਇਕ ਚੰਦਰਾਨਾਥ ਰਾਠ ਦੀ ਮਾਤਾ ਹਸੀਰਾਨੀ ਰਾਠ ਨੂੰ 1,64,427 ਵੋਟਾਂ ਮਿਲੀਆਂ ਜਦਕਿ ਕਾਂਗਰਸ ਦੇ ਮਿਲਨ ਪ੍ਰਧਾਨ ਨੂੰ 41,674 ਵੋਟਾਂ ਹਾਸਲ ਹੋਈਆਂ। ਖੱਬੇ ਮੋਰਚੇ, ਆਈ.ਐੱਸ.ਐੱਫ. ਤੇ ਤ੍ਰਿਣਮੂਲ ਕਾਂਗਰਸ ਦੇ ਬਾਗ਼ੀ ਧੜੇ ਡੈਮੋਕ੍ਰੈਟਿਕ ਤ੍ਰਿਣਮੂਲ ਕਾਂਗਰਸ ਸਮੇਤ ਹੋਰ ਸਾਰੇ ਉਮੀਦਵਾਰਾਂ ਦੀਆਂ ਜ਼ਮਾਨਤਾਂ ਜ਼ਬਤ ਹੋ ਗਈਆਂ। ਸੀ.ਪੀ.ਆਈ. ਦੇ ਉਮੀਦਵਾਰ ਸ਼ਾਂਤੀ ਗੋਪਾਲ ਗਿਰੀ 5,779 ਵੋਟਾਂ ਨਾਲ ਤੀਜੇ ਸਥਾਨ ’ਤੇ ਰਹੇ।
ਇਹ ਜਿੱਤ ਨੰਦੀਗ੍ਰਾਮ ’ਚ ਭਾਜਪਾ ਦੀ ਸਿਆਸੀ ਪਕੜ ਹੋਰ ਮਜ਼ਬੂਤ ਹੋਣ ਦਾ ਸੰਕੇਤ ਹੈ। ਸਾਲ 2011 ਵਿਚ ਜ਼ਮੀਨ ਪ੍ਰਾਪਤੀ ਵਿਰੋਧੀ ਅੰਦੋਲਨ ਨੇ ਤ੍ਰਿਣਮੂਲ ਕਾਂਗਰਸ ਨੂੰ ਸੱਤਾ ਤੱਕ ਪਹੁੰਚਾਉਣ ਵਿਚ ਅਹਿਮ ਭੂਮਿਕਾ ਨਿਭਾਈ ਸੀ। ਇਸ ਤੋਂ ਬਾਅਦ ਨੰਦੀਗ੍ਰਾਮ 2021 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਸੁਵੇਂਦੂ ਅਧਿਕਾਰੀ ਅਤੇ ਮਮਤਾ ਬੈਨਰਜੀ ਵਿਚਾਲੇ ਹਾਈ-ਪ੍ਰੋਫਾਈਲ ਚੋਣ ਮੁਕਾਬਲੇ ਕਾਰਨ ਚਰਚਾ ਵਿਚ ਰਿਹਾ ਸੀ। ਉਸ ਚੋਣ ਵਿਚ ਅਧਿਕਾਰੀ ਨੇ ਮਮਤਾ ਬੈਨਰਜੀ ਨੂੰ ਹਰਾਇਆ ਸੀ।
