ਚੰਡੀਗੜ੍ਹ, 13 ਅਗਸਤ (ਕਪਿਲ ਵਧਵਾ)- ਚੰਡੀਗੜ੍ਹ ਪੁਲਿਸ ਨੇ ਰਾਜਸਥਾਨ ਤੋਂ ਚੰਡੀਗੜ੍ਹ ਹਥਿਆਰ ਸਪਲਾਈ ਕਰਨ ਵਾਲੇ ਗਰੋਹ ਦਾ ਪਰਦਾਫਾਸ਼ ਕਰਦਿਆਂ 5 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਮੁਲਜ਼ਮਾਂ ਦੇ ਕਬਜ਼ੇ ’ਚੋਂ 6 ਹਥਿਆਰ ਅਤੇ 17 ਜ਼ਿੰਦਾ ਕਾਰਤੂਸ ਬਰਾਮਦ ਕੀਤੇ ਹਨ। ਇਸ ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਐੱਸ. ਪੀ. ਗੀਤਾਂਜਲੀ ਖੰਡੇਲਵਾਲ ਨੇ ਕਿਹਾ ਕਿ
ਪੁਲਿਸ ਟੀਮਾਂ ਨੇ ਰਾਜਸਥਾਨ ਤੋਂ ਗੁਰਚਰਨ ਸਿੰਘ ਉਰਫ਼ ਜੀ.ਸੀ. ਨੂੰ ਕਾਬੂ ਕਰਕੇ 2 ਹਥਿਆਰ ਬਰਾਮਦ ਕੀਤੇ। ਜਾਂਚ ਦੌਰਾਨ ਚੰਡੀਗੜ੍ਹ ਤੋਂ ਹੋਈਆਂ ਲੱਖਾਂ ਰੁਪਏ ਦੀਆਂ ਵਿੱਤੀ ਲੈਣ-ਦੇਣ ਦਾ ਵੀ ਪਤਾ ਲੱਗਾ। ਇਸ ਤੋਂ ਬਾਅਦ ਗੁਰਪ੍ਰਚੰਦ ਸਿੰਘ ਉਰਫ਼ ਭੂਰੀ, ਕੁਸ਼ਪਿੰਦਰ ਸਿੰਘ ਉਰਫ਼ ਭੂਰਾ, ਲੋਕੇਸ਼ ਮੀਣਾ ਅਤੇ ਸਰਵਨ ਸਿੰਘ ਉਰਫ਼ ਸੋਲੀ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ। ਪੁਲਿਸ ਜਾਂਚ ਅਨੁਸਾਰ ਭੂਰਾ ਅਤੇ ਲੋਕੇਸ਼ ਮੀਣਾ ਵਲੋਂ ਚੰਡੀਗੜ੍ਹ ’ਚ 10 ਤੋਂ 12 ਹਥਿਆਰ ਸਪਲਾਈ ਕੀਤੇ ਜਾਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ। ਪੁਲਿਸ ਨੂੰ ਮੁਲਜ਼ਮਾਂ ਦੇ ਪੁਰਾਣੇ ਅਪਰਾਧਿਕ ਰਿਕਾਰਡ ਵੀ ਮਿਲੇ ਹਨ। ਜਾਂਚ ਮੁਤਾਬਕ ਇਹ ਹਥਿਆਰ ਅਪਰਾਧਿਕ ਗਤੀਵਿਧੀਆਂ ਲਈ ਵਰਤੇ ਜਾਣੇ ਸਨ। ਹਥਿਆਰ ਕਰੀਬ 40 ਹਜ਼ਾਰ ਰੁਪਏ ਅਤੇ ਦੇਸੀ ਕੱਟਾ ਲਗਭਗ 15 ਹਜ਼ਾਰ ਰੁਪਏ ’ਚ ਵੇਚੇ ਜਾਣ ਦੀ ਗੱਲ ਸਾਹਮਣੇ ਆਈ ਹੈ।
