ਬੱਸ ਦੀ ਉਡੀਕ ਕਰ ਰਹੇ ਵਿਅਕਤੀ ਦੀ ਜੇਬ ਕੱਟ ਕੇ ਮੋਬਾਈਲ ਤੇ ਨਕਦੀ ਚੋਰੀ

ਫਗਵਾੜਾ, 21 ਸਤੰਬਰ (ਹਰਜੋਤ ਸਿੰਘ ਚਾਨਾ)-ਲੁਧਿਆਣਾ ਤੋਂ ਫਗਵਾੜਾ ਆਏ ਇੱਕ ਵਿਅਕਤੀ ਦੀ ਜੇਬ ਕੱਟ ਕੇ ਅਣਪਛਾਤੇ ਚੋਰ ਮੋਬਾਈਲ ਫ਼ੋਨ ਤੇ ਨਕਦੀ ਲੈ ਕੇ ਫ਼ਰਾਰ ਹੋ ਗਏ | ਜਾਣਕਾਰੀ ਅਨੁਸਾਰ ਜਲੰਧਰ ਵਾਸੀ ਗੱਜਣ ਸਿੰਘ ਰਾਤ ਸਮੇਂ ਲੁਧਿਆਣਾ ਤੋਂ ਫਗਵਾੜਾ ਆਇਆ ਸੀ ਅਤੇ ਇੱਥੋਂ ਨਕੋਦਰ ਜਾਣ ਵਾਲੀ ਬੱਸ ਫੜਨੀ ਸੀ | ਇਸ ਦੌਰਾਨ ਉਹ ਬੱਸ ਅੱਡੇ ‘ਤੇ ਸੌਂ ਗਿਆ | ਤੜਕੇ ਜਦੋਂ ਉਸ ਦੀ ਅੱਖ ਖੁੱਲ੍ਹੀ ਤਾਂ ਉਸ ਨੇ ਦੇਖਿਆ ਕਿ ਕਿਸੇ ਅਣਪਛਾਤੇ ਵਿਅਕਤੀ ਨੇ ਉਸ ਦੀ ਜੇਬ ਕੱਟ ਦਿੱਤੀ ਸੀ | ਚੋਰ ਉਸ ਦੀ ਜੇਬ ‘ਚੋਂ ਇੱਕ ਮੋਬਾਈਲ ਫ਼ੋਨ ਤੇ 3,400 ਰੁਪਏ ਦੀ ਨਕਦੀ ਚੋਰੀ ਕਰਕੇ ਫ਼ਰਾਰ ਹੋ ਗਏ | ਗੱਜਣ ਸਿੰਘ ਨੇ ਘਟਨਾ ਸਬੰਧੀ ਪੁਲੀਸ ਨੂੰ ਸੂਚਿਤ ਕਰ ਦਿੱਤਾ ਹੈ | ਪੁਲੀਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ |