ਨਡਾਲਾ, 20 ਜਨਵਰੀ (ਰਘਬਿੰਦਰ ਸਿੰਘ)-ਇੱਥੇ ਨਡਾਲਾ ਵਿਖੇ ਚੁੰਨੀਆਂ ਰੰਗਣ ਦਾ ਕੰਮ ਕਰਦੇ ਪ੍ਰਵਾਸੀ ਮਜ਼ਦੂਰ ਕੁਲਦੀਪ ਸਾਹਨੀ ਨੇ ਇਮਾਨਦਾਰੀ ਤੇ ਮਨੁੱਖਤਾ ਦੀ ਸ਼ਾਨਦਾਰ ਮਿਸਾਲ ਪੇਸ਼ ਕਰਦੇ ਹੋਏ ਇੱਕ ਲੱਭਿਆ ਹੋਇਆ ਪਰਸ ਉਸ ਦੇ ਅਸਲ ਮਾਲਕ ਸਿਕੰਦਰ ਸਿੰਘ ਵਾਸੀ ਰਾਵਾਂ (ਬੇਗੋਵਾਲ) ਤੱਕ ਸੁਰੱਖਿਅਤ ਤਰੀਕੇ ਨਾਲ ਪਹੁੰਚਾ ਦਿੱਤਾ ਹੈ | ਗੱਲਬਾਤ ਕਰਦਿਆਂ ਰਾਹੁਲ ਸੱਚਦੇਵਾ ਨੇ ਦੱਸਿਆ ਕਿ ਕੁਲਦੀਪ ਸਾਹਨੀ ਨੂੰ ਉਸ ਦੀ ਦੁਕਾਨ ਨੇੜਿਉਂ ਇੱਕ ਪਰਸ ਮਿਲਿਆ, ਜਿਸ ਵਿਚ ਕੁੱਝ ਨਕਦੀ ਅਤੇ ਜ਼ਰੂਰੀ ਦਸਤਾਵੇਜ਼ ਮੌਜੂਦ ਸਨ |ਕੁਲਦੀਪ ਸਾਹਨੀ ਨੇ ਪਰਸ ਵਿਚ ਮੌਜੂਦ ਪਛਾਣ ਸਬੰਧੀ ਦਸਤਾਵੇਜ਼ਾਂ ਦੇ ਆਧਾਰ 'ਤੇ ਪਰਸ ਦੇ ਮਾਲਕ ਨਾਲ ਸੰਪਰਕ ਕੀਤਾ ਅਤੇ ਪੂਰੀ ਤਸਦੀਕ ਤੋਂ ਬਾਅਦ ਪਰਸ ਉਸ ਦੇ ਹਵਾਲੇ ਕਰ ਦਿੱਤਾ | ਪਰਸ ਮਿਲਣ 'ਤੇ ਮਾਲਕ ਨੇ ਕੁਲਦੀਪ ਸਾਹਨੀ ਦਾ ਧੰਨਵਾਦ ਕਰਦੇ ਹੋਏ ਉਸ ਦੀ ਇਮਾਨਦਾਰੀ ਦੀ ਖੁੱਲ੍ਹ ਕੇ ਸਰਾਹਨਾ ਕੀਤੀ | ਇਲਾਕੇ ਦੇ ਲੋਕਾਂ ਵੱਲੋਂ ਵੀ ਕੁਲਦੀਪ ਸਾਹਨੀ ਦੇ ਇਸ ਸਲਾਹੁਣਯੋਗ ਕਦਮ ਦੀ ਪ੍ਰਸ਼ੰਸਾ ਕੀਤੀ ਜਾ ਰਹੀ ਹੈ ਅਤੇ ਕਿਹਾ ਜਾ ਰਿਹਾ ਹੈ ਕਿ ਅਜਿਹੇ ਨੇਕ ਕੰਮ ਸਮਾਜ ਵਿਚ ਭਰੋਸੇ ਨੂੰ ਮਜ਼ਬੂਤ ਕਰਦੇ ਹਨ |