ਮੰਡੀ ਕਿੱਲਿਆਂਵਾਲੀ, 27 ਜਨਵਰੀ (ਇਕਬਾਲ ਸਿੰਘ ਸ਼ਾਂਤ)-ਡੱਬਵਾਲੀ ਦੇ ਵਸਨੀਕ ਕਰੀਬ 25 ਸਾਲਾ ਨੌਜਵਾਨ ਨੇ ਲਾਗਲੇ ਸਰਹੱਦੀ ਪਿੰਡ ਕਿੱਲਿਆਂਵਾਲੀ ਨੇੜੇ ਮਾਈਨਰ ਦੇ ਕੰਢੇ ਰੁੱਖ ਨਾਲ ਫ਼ਾਹਾ ਲੈ ਕੇ ਖੁਦਕੁਸ਼ੀ ਕਰ ਲਈ | ਮਿ੍ਤਕ ਦੀ ਪਛਾਣ ਜਗਮੀਤ ਉਰਫ ਮੀਤ ਪੁੱਤਰ ਦਾਰਾ ਸਿੰਘ ਬਰਾੜ ਵਾਸੀ ਵਾਰਡ 7, ਗੁਰੂ ਜੰਭੇਸ਼ਵਰ ਨਗਰ, ਡੱਬਵਾਲੀ ਵਜੋਂ ਹੋਈ ਹੈ | ਉਸ ਨੇ ਆਪਣੇ ਮਫ਼ਲਰ ਨੂੰ ਰੁੱਖ ਨਾਲ ਬੰਨ੍ਹ ਕੇ ਫਾਹਾ ਲਿਆ | ਦੱਸਿਆ ਜਾਂਦਾ ਹੈ ਕਿ ਮਿ੍ਤਕ ਪਿਛਲੇ ਕੁਝ ਸਮੇਂ ਤੋਂ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਰਹਿੰਦਾ ਸੀ | ਸੂਚਨਾ ਮਿਲਣ ਉਪਰੰਤ ਕਿਲਿਆਂਵਾਲੀ ਪੁਲਿਸ ਨੇ ਮੌਕੇ 'ਤੇ ਪੜਤਾਲ ਸ਼ੁਰੂ ਕਰ ਦਿੱਤੀ | ਮੰਡੀ ਡੱਬਵਾਲੀ ਐਂਬੂਲੈਂਸ ਸੇਵਾ ਟਰੱਸਟ ਦੇ ਸੰਚਾਲਕ ਕੁਲਵੰਤ ਸਿੰਘ ਪਥਰਾਲਾ ਨੇ ਮਿ੍ਤਕ ਦੇਹ ਨੂੰ ਸਰਕਾਰੀ ਹਸਪਤਾਲ ਡੱਬਵਾਲੀ ਵਿਖੇ ਪਹੁੰਚਾਇਆ | ਮਿ੍ਤਕ ਦੇ ਪਿਤਾ ਦਾਰਾ ਸਿੰਘ ਨੇ ਦੱਸਿਆ ਕਿ ਉਸਦਾ ਪੁੱਤਰ ਜਗਮੀਤ ਪਿਛਲੇ ਕੁਝ ਸਮੇਂ ਤੋਂ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਰਹਿੰਦਾ ਸੀ | 26 ਜਨਵਰੀ ਨੂੰ ਸ਼ਾਮ ਕਰੀਬ 6 ਵਜੇ ਉਹ ਘਰੋਂ ਨਿਕਲ ਗਿਆ ਸੀ | ਕਾਫ਼ੀ ਉਡੀਕ ਕਰਨ ਤੋਂ ਬਾਅਦ ਜਦੋਂ ਰਾਤ 9 ਵਜੇ ਤੱਕ ਘਰ ਵਾਪਸ ਨਾ ਆਇਆ ਤਾਂ ਫ਼ੋਨ ਕੀਤਾ ਗਿਆ, ਜਿਸ 'ਤੇ ਜਗਮੀਤ ਸਿੰਘ ਨੇ ਛੇਤੀ ਘਰ ਆਉਣ ਦੀ ਗੱਲ ਕਹੀ, ਪਰ ਬਾਅਦ ਵਿਚ ਉਹ ਵਾਪਸ ਨਹੀਂ ਆਇਆ | ਅੱਜ ਸਵੇਰੇ ਕਰੀਬ 10 ਵਜੇ ਪਰਿਵਾਰ ਨੂੰ ਪਤਾ ਲੱਗਾ ਕਿ ਕਿਲਿਆਂਵਾਲੀ ਪਿੰਡ ਦੇ ਨੇੜੇ ਮਾਈਨਰ ਦੇ ਕੰਢੇ ਰੁੱਖ ਨਾਲ ਇਕ ਨੌਜਵਾਨ ਦੀ ਮਿ੍ਤਕ ਦੇਹ ਲਟਕ ਰਹੀ ਹੈ | ਪਰਿਵਾਰ ਨੇ ਮੌਕੇ 'ਤੇ ਪਹੁੰਚ ਕੇ ਦੇਖਿਆ ਤਾਂ ਉਹ ਜਗਮੀਤ ਦੀ ਲਾਸ਼ ਸੀ | ਪਰਿਵਾਰ ਮੁਤਾਬਿਕ ਨੌਜਵਾਨ ਨੇ ਆਪਣੇ ਮਫ਼ਲਰ ਨਾਲ ਫ਼ਾਹਾ ਲਿਆ ਹੋਇਆ ਸੀ | ਥਾਣਾ ਕਿੱਲਿਆਂਵਾਲੀ (ਆਰਜੀ) ਨੇ ਦਾਰਾ ਸਿੰਘ ਦੇ ਬਿਆਨ 'ਤੇ ਇਤਫ਼ਾਕੀ ਮੌਤ ਦੀ ਕਾਰਵਾਈ ਅਮਲ ਵਿਚ ਲਿਆਂਦੀ ਹੈ |
