ਅਮਰੀਕੀ ਏਜੰਸੀਆਂ ’ਤੇ ਚੀਨੀ ਸਾਇਬਰ ਹਮਲਿਆਂ ਦਾ ਜਾਲ ਤੋੜਿਆ - ਐੱਫ.ਬੀ.ਆਈ. ਨੇ 2 ਹੈਕਿੰਗ ਪਲੇਟਫਾਰਮ ਕੀਤੇ ਬੰਦ

ਨਿਊਯਾਰਕ, 27 ਅਗਸਤ (ਰਾਜੂ ਸ਼ਹਿਬਾਜ਼ਪੁਰਾ)-ਅਮਰੀਕੀ ਨਿਆਂ ਵਿਭਾਗ ਅਤੇ ਐੱਫ. ਬੀ.

ਅ

ਅਜੀਤ ਡੈਸਕ 28-08-2026

ਨਿਊਯਾਰਕ, 27 ਅਗਸਤ (ਰਾਜੂ ਸ਼ਹਿਬਾਜ਼ਪੁਰਾ)-ਅਮਰੀਕੀ ਨਿਆਂ ਵਿਭਾਗ ਅਤੇ ਐੱਫ.ਬੀ.ਆਈ. ਨੇ ਚੀਨ ਸਰਕਾਰ ਦੀ ਹਮਾਇਤ ਪ੍ਰਾਪਤ ਹੈਕਰਾਂ ਵੱਲੋਂ ਚਲਾਏ ਜਾ ਰਹੇ 2 ਵੱਡੇ ਪਲੇਟਫਾਰਮਾਂ ਨੂੰ ਬੰਦ ਕਰਨ ਦਾ ਦਾਅਵਾ ਕੀਤਾ ਹੈ। ਅਦਾਲਤ ਦੀ ਮਨਜ਼ੂਰੀ ਨਾਲ ‘ਕਿਊਸਕੈਨ’ ਤੇ ‘ਕਿਊਟੀਰਾਊਟਰ’ ਨਾਲ ਜੁੜੇ ਤਿੰਨ ਇੰਟਰਨੈੱਟ ਡੋਮੇਨ ਜ਼ਬਤ ਕਰ ਲਏ ਗਏ ਹਨ, ਜਿਸ ਤੋਂ ਬਾਅਦ ਦੋਵੇਂ ਪਲੇਟਫਾਰਮ ਕੰਮ ਕਰਨ ਦੇ ਯੋਗ ਨਹੀਂ ਰਹੇ। ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ‘ਕਿਊ.ਟੀ.ਐੱਫ.ਵਾਈ.’ ਨਾਮਕ ਹੈਕਿੰਗ ਸਮੂਹ ਨੇ 2018 ਤੋਂ ਅਮਰੀਕਾ ਦੀਆਂ ਸੈਂਕੜੇ ਸਰਕਾਰੀ ਅਤੇ ਨਿੱਜੀ ਸੰਸਥਾਵਾਂ ਨੂੰ ਨਿਸ਼ਾਨਾ ਬਣਾਇਆ। ਇਨ੍ਹਾਂ ਵਿੱਚ ਨਾਸਾ, ਫੈਡਰਲ ਰਿਜ਼ਰਵ, ਅਮਰੀਕੀ ਸੈਨੇਟ, ਨਿਆਂ ਵਿਭਾਗ, ਊਰਜਾ ਵਿਭਾਗ, ਸਿਹਤ ਤੇ ਮਨੁੱਖੀ ਸੇਵਾਵਾਂ ਵਿਭਾਗ ਅਤੇ ਨੈਸ਼ਨਲ ਇੰਸਟੀਚਿਊਟਸ ਆਫ਼ ਹੈਲਥ ਸ਼ਾਮਲ ਹਨ। ਹਸਪਤਾਲਾਂ, ਦੂਰਸੰਚਾਰ ਕੰਪਨੀਆਂ, ਬਿਜਲੀ ਸੰਸਥਾਵਾਂ, ਵਿੱਤੀ ਅਦਾਰਿਆਂ ਅਤੇ ਰੱਖਿਆ ਠੇਕੇਦਾਰਾਂ ਦੇ ਨੈੱਟਵਰਕ ਵੀ ਇਸ ਦੇ ਨਿਸ਼ਾਨੇ ’ਤੇ ਰਹੇ। ਅਮਰੀਕੀ ਅਧਿਕਾਰੀਆਂ ਦਾ ਦੋਸ਼ ਹੈ ਕਿ ਇਹ ਸਮੂਹ ਚੀਨ ਸਥਿਤ ਨਾਨਜਿੰਗ ਸ਼ਿਨਜਿਉਵੇਈ ਨੈੱਟਵਰਕ ਟੈਕਨਾਲੋਜੀ ਕੰਪਨੀ ਲਈ ਕੰਮ ਕਰਦਾ ਸੀ। ਕੰਪਨੀ ਪੈਸੇ ਲੈ ਕੇ ਹੈਕਿੰਗ ਸੇਵਾਵਾਂ ਦਿੰਦੀ ਸੀ ਅਤੇ ਇਸ ਦੇ ਗਾਹਕਾਂ ਵਿੱਚ ਚੀਨ ਦਾ ਰਾਜ ਸੁਰੱਖਿਆ ਮੰਤਰਾਲਾ ਅਤੇ ਪੀਪਲਜ਼ ਲਿਬਰੇਸ਼ਨ ਆਰਮੀ ਵੀ ਸ਼ਾਮਲ ਸਨ। ਕਿਊਸਕੈਨ ਦੁਨੀਆ ਭਰ ਵਿੱਚ ਇੰਟਰਨੈੱਟ ਨਾਲ ਜੁੜੇ ਹਜ਼ਾਰਾਂ ਸਮਾਰਟ ਉਪਕਰਨਾਂ ਵਿੱਚ ਖ਼ਤਰਨਾਕ ਸਾਫਟਵੇਅਰ ਦਾਖ਼ਲ ਕਰਦਾ ਸੀ। ਇਨ੍ਹਾਂ ਉਪਕਰਨਾਂ ਨੂੰ ਕਿਊਟੀਰਾਊਟਰ ਨੈੱਟਵਰਕ ਨਾਲ ਜੋੜ ਕੇ ਹੈਕਰ ਆਪਣੀ ਅਸਲ ਪਛਾਣ ਅਤੇ ਚੀਨ ਨਾਲ ਜੁੜੇ ਸਰੋਤ ਨੂੰ ਲੁਕਾਉਂਦੇ ਸਨ। ਜਾਂਚ ਮੁਤਾਬਕ 2019 ਵਿੱਚ ਨਾਸਾ ਦੇ ਨੈੱਟਵਰਕ ਵਿੱਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਸਫਲ ਨਹੀਂ ਹੋਈ ਸੀ। ਸਤੰਬਰ 2024 ਵਿੱਚ ਹੈਕਰਾਂ ਨੇ ਊਰਜਾ ਵਿਭਾਗ ਦੀਆਂ ਤਿੰਨ ਪ੍ਰਯੋਗਸ਼ਾਲਾਵਾਂ, ਨੈਸ਼ਨਲ ਇੰਸਟੀਚਿਊਟਸ ਆਫ਼ ਹੈਲਥ, ਸਿਹਤ ਵਿਭਾਗ ਨਾਲ ਜੁੜੀ ਇੱਕ ਏਜੰਸੀ ਅਤੇ ਇੱਕ ਅਮਰੀਕੀ ਸੁਰੱਖਿਆ ਉਪਕਰਨ ਕੰਪਨੀ ਦੇ ਨੈੱਟਵਰਕਾਂ ਵਿੱਚ ਘੁਸਪੈਠ ਕੀਤੀ। ਅਮਰੀਕੀ ਅਧਿਕਾਰੀਆਂ ਨੇ ਇਹ ਨਹੀਂ ਦੱਸਿਆ ਕਿ ਹੈਕਰਾਂ ਨੂੰ ਕਿੰਨੀ ਸੰਵੇਦਨਸ਼ੀਲ ਜਾਣਕਾਰੀ ਮਿਲੀ ਜਾਂ ਹਮਲਿਆਂ ਨਾਲ ਕਿੰਨਾ ਨੁਕਸਾਨ ਹੋਇਆ। ਐੱਫਬੀਆਈ ਅਤੇ ਨੈਸ਼ਨਲ ਸੁਰੱਖਿਆ ਏਜੰਸੀ ਨੇ ਸੰਭਾਵਿਤ ਨਿਸ਼ਾਨਿਆਂ ਨੂੰ ਭਵਿੱਖ ਦੇ ਹਮਲਿਆਂ ਤੋਂ ਬਚਾਉਣ ਲਈ ਤਕਨੀਕੀ ਸਲਾਹ ਜਾਰੀ ਕੀਤੀ ਹੈ। ਅਟਾਰਨੀ ਜਨਰਲ ਟੌਡ ਬਲਾਂਚ ਅਤੇ ਐੱਫਬੀਆਈ ਡਾਇਰੈਕਟਰ ਕਸ਼ ਪਟੇਲ ਨੇ ਕਿਹਾ ਕਿ ਅਮਰੀਕਾ ਦੇ ਮਹੱਤਵਪੂਰਨ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਸਰਕਾਰੀ ਹਮਾਇਤ ਪ੍ਰਾਪਤ ਹੈਕਰਾਂ ਖ਼ਿਲਾਫ਼ ਤਕਨੀਕੀ ਅਤੇ ਕਾਨੂੰਨੀ ਕਾਰਵਾਈ ਜਾਰੀ ਰਹੇਗੀ।

ਪਿਛਲੀ ਖ਼ਬਰ ਰੱਖੜੀ ਦਾ ਤਿਉਹਾਰ ਤੇ ਔਰਤ ਦੀ ਸੁਰੱਖਿਆ ਅਗਲੀ ਖ਼ਬਰ ਈਰਾਨ ਨਾਲ ਵਪਾਰ ਕਾਰਨ ਅਮਰੀਕਾ ਨੇ 4 ਭਾਰਤੀ ਫਰਮਾਂ ’ਤੇ ਲਗਾਈ ਪਾਬੰਦੀ