ਘਰ ਵਿਚ ਕੰਮ ਕਰਨ ਵਾਲੀ ਔਰਤ ਨੇ 8 ਤੋਲੇ ਸੋਨਾ ਅਤੇ ਪੰਜਾਹ ਹਜ਼ਾਰ ਰੁਪਏ ਕੀਤੇ ਚੋਰੀ ਪੁਲਿਸ ਨੇ ਗ੍ਰਿਫਤਾਰ ਕਰ ਕੇ ਲਿਆ 2 ਦਿਨ ਦਾ ਪੁਲਿਸ ਰਿਮਾਂਡ

ਮੋਗਾ, 4 ਅਕਤੂਬਰ (ਗੁਰਤੇਜ ਸਿੰਘ ਬੱਬੀ)-ਘਰ ਵਿਚ ਕੰਮ ਕਰਨ ਲਈ ਰੱਖੀ ਗਈ ਇਕ ਔਰਤ ਵਲੋਂ ਘਰ ਵਾਲਿਆਂ ਦੀ ਗੈਰ ਹਾਜ਼ਰੀ ਵਿਚ ਅੱਠ ਤੋਲੇ ਸੋਨਾ ਅਤੇ ਪੰਜਾਹ ਹਜ਼ਾਰ ਰੁਪਏ ਚੋਰੀ ਕਰ ਲੈਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਸਬੰਧੀ ਹਰਕਮਲ ਸਿੰਘ ਪੁੱਤਰ ਰਾਜਿੰਦਰਪਾਲ ਸਿੰਘ ਵਾਸੀ ਗਲੀ ਨੰਬਰ 8 ਸੂਰਜ ਨਗਰ ਉੱਤਰੀ ਨੇ ਥਾਣਾ ਸਿਟੀ ਮੋਗਾ ਨੂੰ ਲਿਖਤੀ ਬਿਆਨ ਦਰਜ ਕਰਵਾਏ ਹਨ ਕਿ ਉਨ੍ਹਾਂ ਨੇ ਆਪਣੇ ਘਰ ਵਿਚ ਇਕ ਔਰਤ ਮਮਤਾ ਪਤਨੀ ਗੋਰਾ ਵਾਸੀ ਗਲੀ ਨੰਬਰ ਇਕ ਟੀਚਰ ਕਾਲੋਨੀ ਮੋਗਾ ਨੂੰ 21 ਮਾਰਚ 2026 ਤੋਂ ਕੰਮ ਕਰਨ ਲਈ ਰੱਖਿਆ ਹੋਇਆ ਸੀ| ਇਸ ਦੇ ਨਾਲ ਹੀ ਘਰ ਵਿਚ ਜੁੜਵੇਂ ਬੱਚੇ ਹੋਣ ਕਾਰਨ ਉਨ੍ਹਾਂ ਵਲੋਂ ਬੱਚਿਆਂ ਦੀ ਦੇਖਭਾਲ ਲਈ ਇਕ ਕੇਅਰ ਟੇਕਰ ਸਿਮਰਨ ਕੌਰ ਪੁੱਤਰੀ ਅਸ਼ਵਨੀ ਕੁਮਾਰ ਵਾਸੀ ਅੰਮ੍ਰਿਤਸਰ ਨੂੰ ਵੀ ਰੱਖਿਆ ਹੋਇਆ ਸੀ ਤਾਂ 11 ਮਈ 2026 ਨੂੰ ਬਿਜਲੀ ਦਾ ਪਾਵਰ ਕੱਟ ਹੋਣ ਅਤੇ ਘਰ ਦਾ ਇਨਵਰਟਰ ਵੀ ਬੰਦ ਹੋਣ ਕਰਕੇ ਉਹ ਆਪਣੇ ਪਰਿਵਾਰ ਸਮੇਤ ਕੇਅਰ ਟੇਕਰ ਸਿਮਰਨ ਕੌਰ ਦੇ ਨਾਲ ਹੋਟਲ ਅਰਮਾਨ ਚਲੇ ਗਏ ਤਾਂ ਬਾਅਦ ਵਿਚ ਮਮਤਾ ਆਪਣੀ ਮਾਸੀ ਦੀ ਕੁੜੀ ਪ੍ਰੀਤ ਨਾਲ ਉਨ੍ਹਾਂ ਦੇ ਘਰ ਆਈ ਤੇ ਉਸ ਨੇ ਮੌਕੇ ਦਾ ਫਾਇਦਾ ਉਠਾ ਕੇ ਉਸ ਦੇ ਬੈੱਡ ਦੇ ਦਰਾਜ਼ ਵਿਚੋਂ ਅੱਠ ਤੋਲੇ ਸੋਨਾ ਤੇ ਪੰਜਾਹ ਹਜ਼ਾਰ ਦੀ ਨਕਦੀ ਚੋਰੀ ਕਰ ਲਈ ਅਤੇ ਉਸ ਤੋਂ ਬਾਅਦ ਉਹ ਇਕ ਦਿਨ ਕੰਮ ’ਤੇ ਆਈ ਤੇ ਮੁੜ ਕੰਮ ’ਤੇ ਆਉਣਾ ਬੰਦ ਕਰ ਦਿੱਤਾ| ਉਨ੍ਹਾਂ ਵਲੋਂ ਵਾਰ-ਵਾਰ ਫੋਨ ਕਰਨ ’ਤੇ ਉਹ ਦੁਬਾਰਾ ਜਦੋਂ ਕੰਮ ’ਤੇ ਆਈ ਤਾਂ ਘਰ ਵਿਚੋਂ ਗਾਇਬ ਹੋਈਆਂ ਚੀਜ਼ਾਂ ਬਾਰੇ ਪੁੱਛਣ ਤੇ ਉਸ ਨੇ ਕੋਈ ਸਪੱਸ਼ਟ ਜੁਆਬ ਨਹੀਂ ਦਿੱਤਾ | ਉਨ੍ਹਾਂ ਜਦੋਂ ਆਪਣਾ ਸਮਾਨ ਅਤੇ ਗਹਿਣੇ ਚੈੱਕ ਕੀਤੇ ਤਾਂ ਬੈੱਡ ਦੇ ਦਰਾਜ਼ ਵਿਚੋਂ ਅੱਠ ਤੋਲੇ ਸੋਨਾ ਤੇ ਪੰਜਾਹ ਹਜ਼ਾਰ ਰੁਪਏ ਗਾਇਬ ਸਨ।