ਹੂਤੀਆਂ ਵਲੋਂ ਸਾਊਦੀ ਅਰਬ ਦੇ ਤੇਲ ਪਲਾਂਟ ਤੇ ਯਮਨ ਬੰਦਰਗਾਹ ’ਤੇ ਹਮਲੇ ਦਾ ਦਾਅਵਾ
ਸਨਾ, 9 ਅਗਸਤ (ਏਜੰਸੀ)- ਯਮਨ ਦੇ ਹੂਤੀ ਬਾਗ਼ੀਆਂ ਨੇ ਕਿਹਾ ਕਿ ਉਨ੍ਹਾਂ ਨੇ ਐਤਵਾਰ ਨੂੰ ਦੱਖਣ-ਪੱਛਮੀ ਸਾਊਦੀ ਅਰਬ ’ਚ ਇਕ ਤੇਲ ਪਲਾਂਟ ’ਤੇ ਹਮਲਾ ਕੀਤਾ, ਜੋ ਕਿ ਈਰਾਨ-ਸਮਰਥਿਤ ਬਾਗੀਆਂ ਦੁਆਰਾ ਰਾਜ ’ਤੇ ਤਾਜ਼ਾ ਹਮਲਾ ਹੈ। ਉਨ੍ਹਾਂ ਨੇ ਲਾਲ ਸਾਗਰ ’ਤੇ ਇਕ ਮਹੱਤਵਪੂਰਨ ਬੰਦਰਗਾਹ ’ਤੇ ਵੀ ਹਮਲਾ ਕੀਤਾ।
ਸਨਾ, 9 ਅਗਸਤ (ਏਜੰਸੀ)- ਯਮਨ ਦੇ ਹੂਤੀ ਬਾਗ਼ੀਆਂ ਨੇ ਕਿਹਾ ਕਿ ਉਨ੍ਹਾਂ ਨੇ ਐਤਵਾਰ ਨੂੰ ਦੱਖਣ-ਪੱਛਮੀ ਸਾਊਦੀ ਅਰਬ ’ਚ ਇਕ ਤੇਲ ਪਲਾਂਟ ’ਤੇ ਹਮਲਾ ਕੀਤਾ, ਜੋ ਕਿ ਈਰਾਨ-ਸਮਰਥਿਤ ਬਾਗੀਆਂ ਦੁਆਰਾ ਰਾਜ ’ਤੇ ਤਾਜ਼ਾ ਹਮਲਾ ਹੈ। ਉਨ੍ਹਾਂ ਨੇ ਲਾਲ ਸਾਗਰ ’ਤੇ ਇਕ ਮਹੱਤਵਪੂਰਨ ਬੰਦਰਗਾਹ ’ਤੇ ਵੀ ਹਮਲਾ ਕੀਤਾ। ਇਸ ਦੌਰਾਨ ਈਰਾਨ ਨੇ ਗੱਲਬਾਤ ਨੂੰ ਮੁੜ ਸ਼ੁਰੂ ਕਰਨ ਅਤੇ ਹੋਰਮੁਜ਼ ਜਲਡਮਰੂ ਨੂੰ ਦੁਬਾਰਾ ਖੋਲ੍ਹਣ ਬਾਰੇ ਨਵੀਆਂ ਮੰਗਾਂ ਪੇਸ਼ ਕੀਤੀਆਂ ਹਨ ਅਤੇ ਪੈਂਟਾਗਨ ਅਮਰੀਕੀ ਰੱਖਿਆ ਉਦਯੋਗ ’ਤੇ ਹਥਿਆਰਾਂ ਦੇ ਉਤਪਾਦਨ ਨੂੰ ਤੇਜ਼ ਕਰਨ ਲਈ ਦਬਾਅ ਪਾ ਰਿਹਾ ਹੈ। ਹੂਤੀ ਬਾਗ਼ੀਆਂ ਦੇ ਇਕ ਫੌਜੀ ਬੁਲਾਰੇ ਯਾਹੀਆ ਸਾਰੀ ਨੇ ਕਿਹਾ ਕਿ ਉਨ੍ਹਾਂ ਨੇ ਜਜ਼ਾਨ ਸ਼ਹਿਰ ਵਿਚ ਇਕ ਅਰਾਮਕੋ ਰਿਫਾਇਨਰੀ ਨੂੰ ਇਕ ਡਰੋਨ ਨਾਲ ਨਿਸ਼ਾਨਾ ਬਣਾਇਆ। ਇਹ ਹਮਲਾ ਸਾਊਦੀ ਡਰੋਨਾਂ ਵਲੋਂ ਹੱਜਾਹ ਅਤੇ ਸਾਦਾ ਪ੍ਰਾਂਤਾਂ ’ਤੇ ਯਮਨ ਦੇ ਹਵਾਈ ਖੇਤਰ ਦੀ ਉਲੰਘਣਾ ਕਰਨ ਦੇ ਜਵਾਬ ਵਿਚ ਕੀਤਾ ਗਿਆ। ਐਤਵਾਰ ਸਵੇਰੇ, ਸਾਊਦੀ ਊਰਜਾ ਮੰਤਰਾਲੇ ਨੇ ਬਿਨਾਂ ਕਿਸੇ ਜਾਨੀ ਨੁਕਸਾਨ ਦੇ ਅਰਾਮਕੋ ਰਿਫਾਇਨਰੀ ਨਾਲ ਸੰਬੰਧਤ ਇਕ ਪਲਾਂਟ ’ਤੇ ਅੱਗ ਲੱਗਣ ਦੀ ਰਿਪੋਰਟ ਦਿੱਤੀ । ਯਮਨ ਦੇ ਇਕ ਅਧਿਕਾਰੀ ਨੇ ਕਿਹਾ ਕਿ ਹੂਤੀਆਂ ਨੇ ਲਾਲ ਸਾਗਰ ’ਤੇ ਇਕ ਮਹੱਤਵਪੂਰਨ ਬੰਦਰਗਾਹ ’ਤੇ ਵੀ ਹਮਲਾ ਕੀਤਾ। ਸੂਚਨਾ ਮੰਤਰਾਲੇ ਦੇ ਸਹਾਇਕ ਅੰਡਰ ਸੈਕਟਰੀ ਫਾਇਦ ਅਲ-ਨੋਮਾਨ ਨੇ ਕਿਹਾ ਕਿ ਹੂਤੀਆਂ ਨੇ ਮੋਚਾ ਬੰਦਰਗਾਹ ’ਤੇ ਮਿਜ਼ਾਈਲਾਂ ਅਤੇ ਡਰੋਨ ਦਾਗੇ, ਜਿਸ ਨਾਲ ਇਸ ਦੀਆਂ ਇਮਾਰਤਾਂ ਅਤੇ ਬੰਦਰਗਾਹ ਦੇ ਨਾਲ-ਨਾਲ ਵਪਾਰਕ ਸਾਮਾਨ ਅਤੇ ਭੋਜਨ ਸਪਲਾਈ ਨੂੰ ਭਾਰੀ ਨੁਕਸਾਨ ਪਹੁੰਚਿਆ। ਸੰਭਾਵੀ ਈਰਾਨ-ਓਮਾਨ ਸਮਝੌਤਾ ਸੂਤਰਾਂ ਅਨੁਸਾਰ ਈਰਾਨ ਅਤੇ ਓਮਾਨ ਇਕ ਅਸਥਾਈ ਸਮਝੌਤੇ ਨੂੰ ਅੰਤਿਮ ਰੂਪ ਦੇਣ ਲਈ ਕੰਮ ਕਰ ਰਹੇ ਹਨ, ਜਿਸ ਨਾਲ ਰਸਤਾ ਫਿਰ ਤੋਂ ਖੁੱਲ ਜਾਵੇਗਾ ਅਤੇ ਜਹਾਜ਼ ਈਰਾਨ ਨੇੜੇ ਇਕ ਰਸਤੇ ਰਾਹੀਂ ਜਲਮਾਰਗ ’ਚ ਦਾਖਲ ਹੋਣਗੇ ਅਤੇ ਓਮਾਨ ਦੇ ਨੇੜੇ ਇਕ ਰਸਤੇ ਰਾਹੀਂ ਬਾਹਰ ਨਿਕਲਣਗੇ। ਇਸ ਵਿਚਲੇ ਸਮੇਂ ’ਚ ਜਹਾਜ਼ ਬਿਨਾਂ ਫ਼ੀਸ ਜਾਂ ਟੋਲ ਦਿੱਤੇ ਜਲਡਮਰੂ ਨੂੰ ਪਾਰ ਕਰਨਗੇ। ਅਮਰੀਕਾ ਦਾ ਰਵੱਈਆ ਠੀਕ ਹੋਣ ’ਤੇ ਹੀ ਹੋਰਮੁਜ਼ ਨੂੰ ਖੋਲ੍ਹਿਆ ਜਾਵੇਗਾ- ਈਰਾਨ ਈਰਾਨ ਦੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਘਚੀ ਨੇ ਕਿਹਾ ਕਿ ਨਵੇਂ ਰਸਤਿਆਂ ’ਤੇ ਇਕ ਸਮਝੌਤਾ ਹੋ ਸਕਦਾ ਹੈ, ਪਰ ਜਲਡਮਰੂ ਨੂੰ ਦੁਬਾਰਾ ਖੋਲ੍ਹਣਾ ਕਈ ਹੋਰ ਸ਼ਰਤਾਂ ਅਧੀਨ ਹੈ, ਜੋ ਕਿ ਵਿਚੋਲਿਆਂ ਰਾਹੀਂ ਦੱਸੀਆਂ ਗਈਆਂ ਹਨ। ਈਰਾਨ ਦੀ ਰਾਸ਼ਟਰੀ ਸੁਰੱਖਿਆ ਪ੍ਰੀਸ਼ਦ ਨੇ ਕਿਹਾ ਕਿ ਹੋਰਮੁਜ਼ ਜਲਡਮਰੂ ਉਦੋਂ ਤੱਕ ਨਹੀਂ ਖੁੱਲ੍ਹੇਗਾ ਜਦੋਂ ਤੱਕ ਅਮਰੀਕਾ ਆਪਣੇ ਵਿਵਹਾਰ ’ਚ ਸੁਧਾਰ ਨਹੀਂ ਕਰ ਲੈਂਦਾ।
