ਵਾਸ਼ਿੰਗਟਨ/ਤਹਿਰਾਨ, 11 ਅਪ੍ਰੈਲ (ਏਜੰਸੀ)-ਅਮਰੀਕੀ ਸੈਨਾ ਨੇ ਦੱਸਿਆ ਕਿ ਬਰੂਦੀ ਸੁਰੰਗਾਂ ਹਟਾਉਣ ਦੇ ਕੰਮ ਤੋਂ ਪਹਿਲਾਂ ਦੋ ਜੰਗੀ ਬੇੜੇ ਈਰਾਨ ਦੇ ਕੰਟਰੋਲ ਵਾਲੇ ਹੋਰਮੁਜ਼ ਜਲਮਾਰਗ ਤੋਂ ਲੰਘੇ, ਜੰਗ ਸ਼ੁਰੂ ਹੋਣ ਤੋਂ ਬਾਅਦ ਅਜਿਹਾ ਪਹਿਲੀ ਵਾਰ ਹੋਇਆ ਹੈ | ਹਾਲਾਂਕਿ ਈਰਾਨ ਦੇ ਸਰਕਾਰੀ ਮੀਡੀਆ ਨੇ ਇਸ ਤੋਂ ਪਹਿਲਾਂ ਕਿਹਾ ਸੀ ਕਿ ਈਰਾਨ ਨੇ ਅਮਰੀਕੀ ਸੈਨਾ ਦੇ ਇਕ ਜਹਾਜ਼ ਨੂੰ ਜੋ ਇਸ ਜਲਮਾਰਗ ਨੂੰ ਪਾਰ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਵਾਪਸ ਪਰਤਨ ਲਈ ਮਜ਼ਬੂਰ ਕਰ ਦਿੱਤਾ | ਦੱਸਿਆ ਜਾ ਰਿਹਾ ਹੈ ਕਿ ਜਹਾਜ਼ ਪੂਰਬ ਤੋਂ ਪੱਛਮ ਵੱਲ ਖਾੜੀ 'ਚ ਗਏ ਅਤੇ ਫਿਰ ਅਰਬ ਸਾਗਰ 'ਚ ਪਰਤ ਆਏ | ਹਾਲਾਂਕਿ, ਇਕ ਖੇਤਰੀ ਖੁਫ਼ੀਆ ਅਧਿਕਾਰੀ ਨੇ ਕਿਹਾ ਕਿ ਦੋ ਅਮਰੀਕੀ ਨੇਵੀ 'ਅਰਲੇ ਬਰਕ-ਕਲਾਸ' ਬੇੜਿਆਂ ਨੇ 'ਸਟ੍ਰੇਟ ਆਫ਼ ਹੋਰਮੁਜ਼' ਨੂੰ ਪਾਰ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਈਰਾਨ ਦੇ ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ (ਆਈ.ਆਰ.ਜੀ.ਸੀ.) ਦੇ 30 ਮਿੰਟ ਦੇ 'ਅਲਟੀਮੇਟਮ' ਤੋਂ ਬਾਅਦ ਉਨ੍ਹਾਂ ਨੂੰ ਵਾਪਸ ਮੁੜਨ ਲਈ ਮਜਬੂਰ ਹੋਣਾ ਪਿਆ | ਇਸ ਦੌਰਾਨ ਆਈ.ਆਰ.ਜੀ.ਸੀ. ਵਲੋਂ ਜਹਾਜ਼ਾਂ ਵੱਲ ਇਕ ਡਰੋਨ ਵੀ ਲਾਂਚ ਕੀਤਾ ਗਿਆ | ਇਹ ਵੀ ਜਾਣਕਾਰੀ ਹੈ ਕਿ ਈਰਾਨੀ ਫ਼ੌਜਾਂ ਨੇ ਫੁਜੈਰਾਹ ਤੋਂ ਹੋਰਮੁਜ਼ ਵੱਲ ਵਧ ਰਹੇ ਇਕ ਅਮਰੀਕੀ ਬੇੜੇੇ ਦੀ ਨਿਗਰਾਨੀ ਕੀਤੀ ਅਤੇ ਪਾਕਿਸਤਾਨੀ ਵਿਚੋਲਿਆਂ ਰਾਹੀਂ ਚਿਤਾਵਨੀ ਦਿੱਤੀ, ਜਿਸ ਤੋਂ ਬਾਅਦ ਜਹਾਜ਼ ਵਾਪਸ ਮੁੜ ਗਿਆ |
