ਨਵੀਂ ਦਿੱਲੀ, 18 ਫਰਵਰੀ (ਏਜੰਸੀ)-ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨੇ ਭਾਰਤ ਤੇ ਫਰਾਂਸ ਨੂੰ ਪ੍ਰਭੂਸੱਤਾ ਸੰਪੰਨ ਏ.ਆਈ. ਸਮਰੱਥਾ ਤੇ ਪ੍ਰਤਿਭਾ ਬਣਾਉਣ ਦੀ ਲੋੜ 'ਤੇ ਜ਼ੋਰ ਦਿੱਤਾ ਤਾਂ ਕਿ ਇਹ ਯਕੀਨੀ ਹੋ ਸਕੇ ਕਿ ਏ.ਆਈ. ਵਿਕਾਸ ਕੁਝ ਵਿਸ਼ਵ ਤਾਕਤਾਂ 'ਤੇ ਜ਼ਿਆਦਾ ਨਿਰਭਰਤਾ ਤੋਂ ਬਿਨਾਂ ਮਨੁੱਖਤਾ ਦੀ ਸੇਵਾ ਕਰ ਸਕੇ | ਸਿਹਤ ਸੰਭਾਲ ਅਤੇ ਉਭਰ ਰਹੀਆਂ ਤਕਨਾਲੋਜੀਆਂ 'ਚ ਭਾਰਤ-ਫਰਾਂਸੀਸੀ ਸਹਿਯੋਗ ਨੂੰ ਮਜ਼ਬੂਤ ਕਰਨ ਦੇ ਕਦਮ ਵਜੋਂ ਕੇਂਦਰੀ ਸਿਹਤ ਮੰਤਰੀ ਜੇ.ਪੀ. ਨੱਢਾ ਅਤੇ ਮੈਕਰੋਨ ਨੇ ਬੁੱਧਵਾਰ ਨੂੰ ਆਲ ਇੰਡੀਆ ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸਜ਼ (ਏਮਜ਼), ਦਿੱਲੀ ਵਿਖੇ ਇਕ ਇੰਡੋ-ਫਰਾਂਸੀਸੀ ਸੈਂਟਰ ਫਾਰ ਏ.ਆਈ. ਇਨ ਹੈਲਥ (ਆਈ.ਐਫ.-ਸੀ.ਏ.ਆਈ.ਐਚ.) ਦਾ ਉਦਘਾਟਨ ਕੀਤਾ | ਇਸ ਮੌਕੇ ਮੈਕਰੋਨ ਨੇ ਕਿਹਾ ਕਿ ਭਾਰਤ ਅਤੇ ਫਰਾਂਸ ਆਪਣੇ ਭਰੋਸੇਮੰਦ ਏ.ਆਈ. ਸਿਸਟਮ ਬਣਾਉਣ ਲਈ ਜ਼ਰੂਰੀ ਕੰਪਿਊਟਿੰਗ ਸਮਰੱਥਾ ਅਤੇ ਪ੍ਰਤਿਭਾ ਨੂੰ ਵਿਕਸਤ ਕਰਨ ਲਈ ਵਚਨਬੱਧ ਹਨ, ਕਿਉਂਕਿ ਅਸੀਂ ਸਿਰਫ਼ ਕਿਤੇ ਹੋਰ ਬਣਾਈਆਂ ਅਤੇ ਪ੍ਰਬੰਧਿਤ ਤਕਨਾਲੋਜੀਆਂ 'ਤੇ ਨਿਰਭਰ ਨਹੀਂ ਕਰ ਸਕਦੇ | ਜ਼ਿੰਮੇਵਾਰ ਸ਼ਾਸਨ 'ਤੇ ਜ਼ੋਰ ਦਿੰਦੇ ਹੋਏ ਮੈਕਰੋਨ ਨੇ ਕਿਹਾ ਕਿ ਏ.ਆਈ. (ਆਰਟੀਫਿਸ਼ੀਅਲ ਇੰਟੈਲੀਜੈਂਸ) ਨੂੰ ਮਨੁੱਖਤਾ ਦੀ ਸੇਵਾ ਕਰਨੀ ਚਾਹੀਦੀ ਹੈ, ਬੱਚਿਆਂ ਲਈ ਮਜ਼ਬੂਤ ??ਸੁਰੱਖਿਆ, ਪੱਖਪਾਤ ਨੂੰ ਹੱਲ ਕਰਨ ਲਈ ਐਲਗੋਰਿਦਮ 'ਚ ਪਾਰਦਰਸ਼ਤਾ ਅਤੇ ਭਾਸ਼ਾਈ ਅਤੇ ਸੱਭਿਆਚਾਰਕ ਵਿਭਿੰਨਤਾ ਨੂੰ ਸੁਰੱਖਿਅਤ ਬਣਾਈ ਰੱਖਣ ਲਈ ਇਕ ਦਿ੍ੜ ਵਚਨਬੱਧਤਾ ਦੇ ਨਾਲ, ਇਹ ਅਜਿਹੇ ਖੇਤਰ ਹਨ ਜਿਥੇ ਭਾਰਤ ਅਤੇ ਫਰਾਂਸ ਦਾ ਇਕੋ ਜਿਹਾ ਦਿ੍ਸ਼ਟੀਕੋਣ ਹੈ |
