ਮੁੱਲਾਂਪੁਰ ਗਰੀਬਦਾਸ, 21 ਫ਼ਰਵਰੀ (ਦਿਲਬਰ ਸਿੰਘ ਖੈਰਪੁਰ)-ਭਾਈ ਅੰਮਿ੍ਤਪਾਲ ਸਿੰਘ ਦੇ ਪਿਤਾ ਭਾਈ ਤਰਸੇਮ ਸਿੰਘ ਨੇ ਇਲਾਕੇ ਦੇ ਸਮਾਜਸੇਵੀ ਆਗੂ ਗੁਰਮੀਤ ਸਿੰਘ ਸ਼ਾਂਟੂ ਤੇ ਰਵਿੰਦਰ ਸਿੰਘ ਬਜੀਦਪੁਰ ਨਾਲ ਬੰਦ ਕਮਰਾ ਮੀਟਿੰਗ ਕੀਤੀ | ਇਸ ਸੰਬੰਧੀ ਗੱਲਬਾਤ ਕਰਨ 'ਤੇ ਤਰਸੇਮ ਸਿੰਘ ਨੇ ਦੱਸਿਆ ਕਿ ਉਹ ਇਨ੍ਹਾਂ ਦੀਆਂ ਪੰਥਕ ਤੇ ਸਮਾਜਿਕ ਸੇਵਾਵਾਂ ਸਦਕਾ ਹੀ ਮਿਲਣ ਆਏ ਸੀ | ਇਸ ਮੌਕੇ ਸਾਂਟੂ ਤੇ ਬਜੀਦਪੁਰ ਨੇ ਕਿਹਾ ਕਿ ਇਸ ਮੀਟਿੰਗ ਦੌਰਾਨ ਧਾਰਮਿਕ ਤੇ ਮੌਜੂਦਾ ਰਾਜਨੀਤਿਕ ਸਥਿਤੀ ਬਾਰੇ ਵਿਚਾਰ ਚਰਚਾ ਕੀਤੀ ਗਈ | ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਵਿਚਾਰਧਾਰਾ ਹਮੇਸ਼ਾ ਪਰਿਵਾਰਵਾਦ ਦੇ ਗਲਬੇ ਤੋਂ ਉਲਟ ਅਤੇ ਪੰਥਕ ਸੁਧਾਰਾਂ ਵੱਲ ਹੀ ਜੁੜੀ ਰਹੀ ਹੈ | ਇਸ ਨਾਲ ਇਲਾਕੇ ਤੇ ਹਲਕੇ ਅੰਦਰ ਸਿਆਸਤ ਦੀ ਲਾਟ ਹੋਰ ਵੀ ਮੱਘਣ ਦੇ ਆਸਾਰ ਜਾਪ ਰਹੇ ਹਨ, ਕਿਉਂਕਿ ਅਗਰ ਇਹ ਗਰੁੱਪ ਵੱਡੇ ਤਰੀਕੇ ਨਾਲ ਕਿਸੇ ਸਿਆਸੀ ਧਿਰ ਨਾਲ ਤੁਰੇਗਾ ਤਾਂ ਇਲਾਕੇ ਦੀ ਸਿਆਸਤ ਦੇ ਸਮੀਕਰਨ ਬਦਲਣੇ ਸੰਭਵ ਹਨ | ਇਸ ਮੌਕੇ ਪਰਮਜੀਤ ਸਿੰਘ ਜੌਹਲ, ਰਮਨਜੀਤ ਸਿੰਘ ਖਰੜ, ਜਗਦੀਪ ਸਿੰਘ ਜੱਗੀ ਕੰਸਾਲਾ, ਜੈਮਨੀਨ ਕੌਰ ਖ਼ਾਲਸਾ ਤੇ ਪ੍ਰਗਟ ਸਿੰਘ ਜੱਲੂਖੇੜਾ ਆਦਿ ਹਾਜ਼ਰ ਸਨ |
