20-11-2026
ਅੱਖਰ:
ਵਿਚਾਰ ਪ੍ਰਵਾਹ
ਪ੍ਰਕਾਸ਼ਿਤ: 18-02-2026

ਚੌਕਾਂ 'ਤੇ ਅਖੌਤੀ ਕਿੰਨਰਾਂ ਵਲੋਂ ਵਧਾਈ ਦੀ ਆੜ 'ਚ ਭੀਖ ਮੰਗਣ ਦਾ ਵਧ ਰਿਹਾ ਰੁਝਾਨ ਅਖੌਤੀ ਕਿੰਨਰਾਂ ਵਲੋਂ ਆਪਣੇ ਮਰਦ ਸਾਥੀਆਂ ਨਾਲ ਸ਼ਰ੍ਹੇਆਮ ਕੀਤੀ ਜਾ ਰਹੀ ਮਾਰੂ ਨਸ਼ਿਆਂ ਦੀ ਵਰਤੋਂ! <br/>

ਅਜੀਤ ਡੈਸਕ 18-02-2026
ਫੁੱਲਾਂਵਾਲ, 17 ਫਰਵਰੀ (ਮਨਜੀਤ ਸਿੰਘ ਦੁੱਗਰੀ)-ਸਥਾਨਕ ਕਮਿਸ਼ਨਰੇਟ ਵਲੋਂ ਸਨਅਤੀ ਸ਼ਹਿਰ ਲੁਧਿਆਣਾ ਅੰਦਰ ਭੀਖ ਮੰਗਣ ਦੀ ਅਲਾਮਤ ਨੂੰ ਰੋਕਣ ਲਈ ਕਈ ਉਪਰਾਲੇ ਕਰਨ ਦੇ ਬਾਵਜੂਦ ਇਸ ਅਲਾਮਤ ਨੂੰ ਠੱਲ੍ਹ ਪੈਂਦੀ ਨਜ਼ਰੀ ਨਹੀਂ ਆਉਂਦੀ | ਚਾਹੇ ਲੰਘੇ ਸਮੇਂ ਅੰਦਰ ਡਿਪਟੀ ਕਮਿਸ਼ਨਰ, ਪੁਲਿਸ ਕਮਿਸ਼ਨਰ ਅਤੇ ਬਾਲ ਵਿਕਾਸ ਵਿਭਾਗ ਵਲੋਂ ਮੇਨ ਚੌਕਾਂ-ਚੌਰਾਹਿਆਂ 'ਤੇ ਸਪੈਸ਼ਲ ਆਪ੍ਰੇਸ਼ਨ ਚਲਾਉਂਦਿਆਂ ਬਾਲ ਭਿਖਾਰੀਆਂ ਨੂੰ ਇਸ ਅਲਾਮਤ ਤੋਂ ਮੁਕਤੀ ਦਿਵਾਉਣ ਲਈ ਕਈ ਵਾਰ ਹੰਭਲਾ ਮਾਰਿਆ, ਪਰ ਭਿਖਾਰੀਆਂ ਲਈ ਸੌਖੀ ਕਮਾਈ ਦਾ ਰਾਹ ਹੋਣ ਕਰਕੇ ਉਹ ਸਫਲ ਨਹੀਂ ਹੋਏ, ਸਗੋਂ ਭੀਖ ਮੰਗਣ ਦੇ ਇਸ ਕਾਰੋਬਾਰ ਵਿਚ ਵਾਧਾ ਕਰਦਿਆਂ ਅਖੌਤੀ ਕਿੰਨਰਾਂ ਵਲੋਂ ਸ਼ਹਿਰ ਦੇ ਮੁੱਖ ਚੌਕਾਂ 'ਤੇੇ ਰੈਡ ਲਾਈਟਾਂ ਕਾਰਨ ਰੁਕੇ ਵਾਹਨ ਚਾਲਕਾਂ ਕੋਲੋਂ ਜ਼ਬਰਦਸਤੀ ਵਧਾਈਆਂ ਦੇ ਆੜ ਵਿਚ ਭੀਖ ਮੰਗਣ ਦੀ ਨਵੀਂ ਪਿਰਤ ਪਾ ਦਿੱਤੀ ਹੈ | ਅਜਿਹੇ ਦਿ੍ਸ਼ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਮਾਰਗ 'ਤੇ ਪੈਂਦੇ ਫੁੱਲਾਂਵਾਲ ਚੌਕ ਦੀਆਂ ਲਾਈਟਾਂ ਅਤੇ ਫ਼ਿਰੋਜ਼ਪੁਰ ਮਾਰਗ ਸਥਿਤ ਗਲਾਡਾ ਸਾਹਮਣੇ ਲੱਗੀਆਂ ਲਾਈਟਾਂ 'ਤੇ ਦੇਖਣ ਵਿਚ ਆਮ ਸਾਹਮਣੇ ਆਉਂਦੇ ਹਨ, ਜਿੱਥੇ ਪੰਜ ਤੋਂ ਅੱਠ ਦੀ ਤਾਦਾਦ ਵਿਚ ਇਹ ਅਖੌਤੀ ਕਿੰਨਰ ਆਮ ਹੀ ਵਧਾਈਆਂ ਦੇ ਨਾਮ 'ਤੇ ਭੀਖ ਮੰਗਦੇ ਨਜ਼ਰ ਆਉਂਦੇ ਹਨ, ਜਿਨ੍ਹਾਂ ਨੂੰ ਲੈ ਕੇ ਰਾਹਗੀਰ ਅਤੇ ਵਾਹਨ ਚਾਲਕ ਪਰੇਸ਼ਾਨ ਹਨ | ਵਧਾਈਆਂ ਲੈਣ ਦੇ ਬਹਾਨੇ ਇਹ ਅਖੌਤੀ ਕਿੰਨਰ ਆਉਂਦੀ-ਜਾਂਦੀ ਗੱਡੀ ਨੂੰ ਰੋਕ ਕੇ ਟਰੈਫ਼ਿਕ ਪੁਲਿਸ ਦੇ ਮੁਲਾਜ਼ਮਾਂ ਸਾਹਮਣੇ ਵਧਾਈਆਂ ਦੇ ਰੂਪ ਵਿਚ ਨਾਜਾਇਜ਼ ਵਸੂਲੀ ਕਰਨ ਵਿਚ ਮਸਰੂਫ਼ ਰਹਿੰਦੇ ਹਨ | ਜੇਕਰ ਕੋਈ ਇਨ੍ਹਾਂ ਨੂੰ ਰੋਕਦਾ ਹੈ ਤਾਂ ਇਹ ਆਪਣੇ ਕੱਪੜੇ ਉਤਾਰਨ ਦੀਆਂ ਧਮਕੀਆਂ ਦਿੰਦੇ ਹਨ, ਜਿਸ ਨੂੰ ਦੇਖ ਕੇ ਹਰ ਕੋਈ ਇਨ੍ਹਾਂ ਤੋਂ ਟਾਲ਼ਾ ਵਟਦਾ ਨਜ਼ਰੀ ਆਉਂਦਾ ਹੈ | ਇਨ੍ਹਾਂ ਅਖੌਤੀ ਕਿੰਨਰਾਂ ਨੂੰ ਇਸ ਨਾਲ ਕੋਈ ਮਤਲਬ ਨਹੀਂ ਕਿ ਗੱਡੀ ਚਾਲਕ ਗ਼ਮੀ ਵਾਲੇ ਮਾਹੌਲ 'ਚੋਂ ਆਇਆ ਹੈ | ਅਜਿਹਾ ਹੀ ਇਕ ਮਾਮਲਾ ਬੀਤੇ ਦਿਨੀਂ ਭਾਰਤ ਨਗਰ ਚੌਕ ਵਿਖੇ ਸਾਹਮਣੇ ਆਇਆ ਸੀ, ਜਿੱਥੇ ਆਪਣੇ ਸਾਕ ਸਬੰਧੀ ਦੇ ਸਸਕਾਰ ਤੋਂ ਵਾਪਸ ਮੁੜਦੇ ਹੋਏ ਇਕ ਪਰਿਵਾਰ ਤੋਂ ਇਹਨਾਂ ਅਖੌਤੀ ਕਿੰਨਰਾਂ ਨੇ ਵਧਾਈ ਦੇ ਰੂਪ ਵਿਚ ਭੀਖ ਮੰਗ ਕੇ ਉਨ੍ਹਾਂ ਨੂੰ ਪ੍ਰੇਸ਼ਾਨ ਕੀਤਾ ਗਿਆ | ਹਾਲਾਂਕਿ ਉਸ ਪਰਿਵਾਰ ਵਲੋਂ ਤਰਲੇ ਮਾਰਨ ਦਾ ਵੀ ਕੋਈ ਅਸਰ ਇਨ੍ਹਾਂ ਅਖੌਤੀ ਕਿੰਨਰਾਂ 'ਤੇ ਨਹੀਂ ਹੋਇਆ, ਸਗੋਂ ਇਨ੍ਹਾਂ ਦੇ ਮੁਖੀ ਕਿੰਨਰ ਵਲੋਂ ਸੜਕ ਉਪਰ ਆਪਣੇ ਕੱਪੜੇ ਉਤਾਰਣ ਦੀ ਧਮਕੀ ਦਿੱਤੀ ਗਈ | ਮਾਮਲਾ ਏਨਾ ਅੱਗੇ ਵੱਧ ਗਿਆ ਕਿ ਉਥੋਂ ਲੰਘਣ ਵਾਲੇ ਹੋਰ ਵਾਹਨ ਚਾਲਕ ਵੀ ਉਕਤ ਪਰਿਵਾਰ ਦੇ ਹੱਕ ਵਿਚ ਆ ਗਏ ਤੇ ਸੜਕ 'ਤੇ ਵੱਡਾ ਜਾਮ ਲੱਗ ਗਿਆ, ਜੋ ਕਿ ਪੁਲਿਸ ਪ੍ਰਸ਼ਾਸਨ ਦੇ ਦਖ਼ਲ ਦੇਣ ਤੋਂ ਬਾਅਦ ਹੀ ਖੁੱਲਿ੍ਹਆ | ਉਸ ਤੋਂ ਬਾਅਦ ਚਾਹੇ ਮੁਖੀ ਕਿੰਨਰ ਨੇ ਸੋਸ਼ਲ ਮੀਡੀਆ 'ਤੇ ਆਪਣੇ ਕੀਤੇ ਦੀ ਮਾਫ਼ੀ ਮੰਗ ਲਈ, ਪਰ ਪਰਿਵਾਰ ਨੂੰ ਹੋਈ ਪ੍ਰੇਸ਼ਾਨੀ ਬਾਰੇ ਉਸ ਕੋਲ ਕੋਈ ਜਵਾਬ ਨਹੀਂ ਸੀ | ਸਮਾਜ ਵਿਚ ਇੱਜ਼ਤ ਦੀ ਨਿਗ੍ਹਾ ਨਾਲ ਦੇਖੇ ਜਾਣ ਵਾਲੇ ਮਹੰਤ ਕਿੰਨਰਾਂ ਦੀ ਵੀ ਕਦਰ ਇਨ੍ਹਾਂ ਅਖੌਤੀ ਕਿੰਨਰਾਂ ਵਲੋਂ ਕਿਰਕਿਰੀ ਕਰ ਦਿੱਤੀ ਜਾਂਦੀ ਹੈ | ਜਦੋਂ ਕਿ ਇਹ ਵਧਾਈਆਂ/ਭੀਖ ਮੰਗਣ ਤੋਂ ਬਾਅਦ ਚੌਕ ਵਿਚ ਹੀ ਲੱਗੇ ਤੰਬਾਕੂ ਵਾਲੇ ਖੋਖਿਆਂ 'ਤੇ ਆਪਣੇ ਮਰਦ ਸਾਥੀਆਂ ਸਮੇਤ ਸ਼ਰ੍ਹੇਆਮ ਖੁੱਲੇ੍ਹ ਵਿਚ ਸਿਗਰਟ, ਸਟਿੰਗਾਂ (ਪੀਣ ਵਾਲਾ ਸ਼ਕਤੀ ਵਰਧਕ ਟਾਨਿਕ) ਅਤੇ ਹੋਰ ਮਾਰੂ ਨਸ਼ੇ ਕਰਦੇ ਹਨ | ਹੁਣ ਦੇਖਣਾ ਇਹ ਹੈ ਕਿ ਪ੍ਰਸ਼ਾਸਨ ਇਸ ਅਲਾਮਤ ਤੋਂ ਰਾਹਗੀਰਾਂ ਨੂੰ ਛੁਟਕਾਰਾ ਦਿਵਾਉਣ ਲਈ ਕਿੰਨਾ ਕੁ ਸੁਹਿਰਦ ਹੋਵੇਗਾ |
ਕੀ ਕਹਿਣਾ ਹੈ ਮਹੰਤ ਭੋਲੀ ਦਾ
ਜਦੋਂ ਇਹ ਬਾਬਤ ਮਹੰਤ ਭੋਲੀ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਸਮਾਜ ਹਮੇਸ਼ਾ ਲੋਕਾਂ ਦੀਆਂ ਖ਼ੁਸ਼ੀਆਂ ਲੋਚਦਾ ਹੈ ਅਤੇ ਉਹ ਖ਼ੁਸ਼ੀ ਦੇ ਮੌਕੇ 'ਤੇ ਹੀ ਘਰਾਂ ਤੋਂ ਵਧਾਈਆਂ ਮੰਗਦੇ ਹਨ | ਅਜਿਹੇ ਅਖੌਤੀ ਕਿੰਨਰ ਉਨ੍ਹਾਂ ਦੇ ਸਮਾਜ ਲਈ ਕਲੰਕ ਹਨ | ਪ੍ਰਸ਼ਾਸਨ ਨੂੰ ਇਨ੍ਹਾਂ ਦੀ ਜਾਂਚ ਕਰਵਾ ਕੇ ਸਖ਼ਤੀ ਨਾਲ ਇਸ ਅਲਾਮਤ ਨੂੰ ਰੋਕਣਾ ਚਾਹੀਦਾ ਹੈ |
ਕੀ ਕਹਿਣਾ ਹੈ ਸਮਾਜ ਸੇਵੀ ਸਿੱਧੂ ਦਾ
ਫੁੱਲਾਂਵਾਲ ਮੋਤੀ ਬਾਗ਼ ਵਾਸੀ ਕੁਲਦੀਪ ਸਿੰਘ ਸਿੱਧੂ ਨੇ ਕਿਹਾ ਕਿ ਪ੍ਰਸ਼ਾਸਨ ਨੂੰ ਇਨ੍ਹਾਂ ਅਖੌਤੀ ਕਿੰਨਰਾਂ 'ਤੇ ਸਖ਼ਤ ਕਾਰਵਾਈ ਕਰਕੇ ਚੌਕਾਂ ਵਿਚ ਇਨ੍ਹਾਂ ਦੇ ਮੰਗਣ 'ਤੇ ਪੂਰਨ ਤੌਰ 'ਤੇ ਪਾਬੰਦੀ ਲਗਾਉਣੀ ਚਾਹੀਦੀ ਹੈ |

ਪਿਛਲੀ ਖ਼ਬਰ ਸੀਸੂ ਨੇ 'ਉਤਪਾਦਕਤਾ ਸੁਧਾਰ ਰਾਹੀਂ ਲਾਗਤ ਬਚਤ' ਵਿਸ਼ੇ 'ਤੇ ਇਕ ਜਾਗਰੂਕਤਾ ਸੈਸ਼ਨ ਕਰਵਾਇਆ <br/> ਅਗਲੀ ਖ਼ਬਰ ਲੋਕਾਂ ਦੀ ਸਹਿਮਤੀ ਤੋਂ ਬਿਨਾਂ ਬੰਨ੍ਹ ਨੇੜੇ ਰੇਤਾ ਚੁੱਕੇ ਜਾਣ ਵਰਗੀ ਧੱਕੇਸ਼ਾਹੀ ਨੂੰ ਬਰਦਾਸ਼ਤ ਨਹੀਂ ਕਰਾਂਗੇ-ਇਯਾਲੀ/ਸ...

Subscribers Only Story

ਇਸ ਖ਼ਬਰ ਨੂੰ ਪੂਰਾ ਪੜ੍ਹਨ ਲਈ ਸਬਸਕ੍ਰਾਈਬਰ ਲਾਗਇਨ ਕਰੋ।