ਅਟਾਰੀ, (ਅੰਮਿ੍ਤਸਰ) 5 ਮਾਰਚ (ਗੁਰਦੀਪ ਸਿੰਘ ਅਟਾਰੀ)-ਜ਼ਿਲ੍ਹਾ ਅੰਮਿ੍ਤਸਰ ਦਿਹਾਤੀ ਅਧੀਨ ਆਉਂਦੇ ਪੁਲਿਸ ਥਾਣਾ ਘਰਿੰਡਾ ਦੇ ਪਿੰਡ ਕਾਉਂਕੇ ਵਿਚ ਦਿਨ ਦਿਹਾੜੇ ਗੋਲੀਆਂ ਚੱਲੀਆਂ ਹਨ | ਲੜਕੀ ਮਧੂ (25) ਪਤਨੀ ਰਵੀ ਸਿੰਘ ਪਿੰਡ ਕਾਉਂਕੇ ਅਤੇ ਨੌਜਵਾਨ ਸਤਨਾਮ ਸਿੰਘ (17) ਨੂੰ ਨਿੱਜੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ | ਗੋਲੀਆਂ ਨਜ਼ਦੀਕ ਤੋਂ ਵੱਜੀਆਂ, ਜਿਸ ਕਾਰਨ ਦੋਵਾਂ ਦੇ ਪੱਟਾਂ ਅਤੇ ਬਾਹਾਂ 'ਚੋਂ ਦੂਸਰੇ ਪਾਰ ਨਿਕਲ ਗਈਆਂ | ਘਟਨਾ ਸਥਾਨ 'ਤੇ ਕਾਫੀ ਖੂਨ ਡੱੁਲਿ੍ਹਆ ਹੋਇਆ ਸੀ | ਦੋਵੇਂ ਜ਼ਖ਼ਮੀ ਘਬਰਾਏ ਹੋਏ ਸਨ ਅਤੇ ਪਿੰਡ ਵਿਚ ਵੀ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਸੀ | ਪੁਲਿਸ ਥਾਣਾ ਘਰਿੰਡਾ ਤੋਂ ਸਬ ਇੰਸਪੈਕਟਰ ਰਾਜਬੀਰ ਸਿੰਘ ਅਤੇ ਏ. ਐੱਸ. ਆਈ. ਕਵਰਜੀਤ ਸਿੰਘ ਭਾਰੀ ਪੁਲਿਸ ਫੋਰਸ ਨਾਲ ਘਟਨਾ ਸਥਾਨ 'ਤੇ ਪਹੁੰਚੇ | ਲੜਕੀ ਮਧੂ ਨੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਕ ਲੜਕਾ ਉਸ ਦੀ ਸੱਸ ਦੇ ਰਿਸ਼ਤੇਦਾਰੀ ਵਿਚ ਭਤੀਜਾ ਲੱਗਦਾ ਹੈ ਅਤੇ ਦੂਸਰਾ ਉਸ ਦਾ ਦੋਸਤ | ਉਨ੍ਹਾਂ ਕਿਹਾ ਕਿ ਭਾਬੀ ਚਾਹ ਬਣਾ ਦਿਓ | ਉਹ ਚਾਹ ਫੜਾਉਣ ਗਈ ਤਾਂ ਇਕ ਨੌਜਵਾਨ ਨੇ ਗੋਲੀ ਚਲਾਈ ਜਿਸ ਨਾਲ ਉਹ ਜ਼ਖ਼ਮੀ ਹੋ ਗਈ ਅਤੇ ਸਤਨਾਮ ਸਿੰਘ ਵਾਸੀ ਅਟਾਰੀ ਦੇ ਸਰੀਰ 'ਤੇ ਵੀ ਗੋਲੀਆਂ ਲੱਗੀਆਂ | ਜਾਂਚ ਕਰ ਰਹੇ ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਜ਼ਖ਼ਮੀਆਂ ਕੋਲੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ ਕਿ ਕਿਸ ਨੇ ਅਤੇ ਕਿਉਂ ਗੋਲੀ ਚਲਾਈ ਸੀ? ਪੁਲਿਸ ਵਲੋਂ ਕਿਹਾ ਗਿਆ ਕਿ ਮਾਮਲੇ ਦੀ ਬਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ | ਦੇਰ ਸ਼ਾਮ ਪਤਾ ਚੱਲਿਆ ਹੈ ਕਿ ਕਸਬਾ ਅਟਾਰੀ ਦੇ ਨਿੱਜੀ ਹਸਪਤਾਲ ਤੋਂ ਵੀ ਜ਼ਖ਼ਮੀਆਂ ਨੂੰ ਰੈਫਰ ਕਰ ਦਿੱਤਾ ਗਿਆ | ਅੰਮਿ੍ਤਸਰ ਦੇ ਗੁਰੂ ਨਾਨਕ ਦੇਵ ਹਸਪਤਾਲ ਲਿਜਾਇਆ ਗਿਆ ਤਾਂ ਉਨ੍ਹਾਂ ਨੇ ਵੀ ਪੀ. ਜੀ. ਆਈ. ਚੰਡੀਗੜ੍ਹ ਰੈਫਰ ਕਰ ਦਿੱਤਾ | ਇਸ ਤੋਂ ਲੱਗਦਾ ਹੈ ਕਿ ਖੂਨ ਵੱਧ ਵਗਣ ਨਾਲ ਦੋਵਾਂ ਜ਼ਖ਼ਮੀਆਂ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ |
