ਅੰਮਿ੍ਤਸਰ, 18 ਫਰਵਰੀ (ਰੇਸ਼ਮ ਸਿੰਘ)-ਲਵ ਕੁਛ ਨਗਰ ਵਿਖੇ ਦੋ ਧਿਰਾਂ ਦੀ ਲੜਾਈ ਸੰਬੰਧੀ ਵੀਡੀਓ ਵਾਇਰਲ ਹੋਈ ਹੈ ਜਿਥੇ ਕਿ ਧਿਰ ਨੇ ਇਲਜ਼ਾਮ ਲਾਏ ਹਨ ਕਿ ਉਥੇ ਲੜਾਈ 'ਚ ਪਿਸਤੌਲ ਵੀ ਕੱਢਿਆ ਗਿਆ ਹੈ ਜਦੋਂ ਕਿ ਪੁਲਿਸ ਵਲੋਂ ਪਿਸਤੌਲ ਦੀ ਵਰਤੋਂ ਹੋਣ ਦੀ ਘਟਨਾ ਤੋਂ ਇਨਕਾਰ ਕੀਤਾ ਹੈ | ਥਾਣਾ ਛਾਉਣੀ ਦੇ ਐੱਸ. ਐੱਚ. ਓ. ਸਬ ਇੰਸ: ਜਤਿੰਦਰ ਸਿੰਘ ਨੇ ਦੱਸਿਆ ਕਿ ਇਹ ਘਟਨਾ ਮਿਤੀ 15-16 ਫਰਵਰੀ ਦੀ ਦਰਮਿਆਨੀ ਰਾਤ ਦੀ ਹੈ ਜਦੋਂ ਕਿ ਲਵ ਕੁਛ ਨਗਰ ਜੋ ਕਿ ਰੇਲਵੇ ਲਾਈਨਾਂ ਨੇੜੇ ਪੈਂਦਾ ਹੈ ਵਿਖੇ ਝਗੜਾ ਹੋਇਆ ਸੀ ਜਿਸ 'ਚ 2 ਪਰਿਵਾਰ ਝਗੜੇ ਸਨ ਅਤੇ ਇਸ ਸੰਬੰਧੀ ਸ੍ਰੀਮਤੀ ਅਰਾਧਨਾ ਨੇ ਪੁਲਿਸ ਨੂੰ ਦਰਖਾਸਤ ਦਿੱਤੀ ਸੀ ਕਿ ਉਸਦੇ ਜੇਠ ਦਾ ਮੁੰਡਾ ਈਸ਼ਵਰ ਚੌਹਾਨ ਉਨ੍ਹਾਂ ਦੀ ਮਾਰਕੁਟਾਈ ਕਰ ਰਿਹਾ ਹੈ | ਜੋ ਕਿ ਤੁਰੰਤ ਪੁਲਿਸ ਵਲੋਂ ਕਾਰਵਾਈ ਕਰਦਿਆਂ ਈਸ਼ਵਰ ਚੌਹਾਨ ਨੂੰ ਗਿ੍ਫਤਾਰ ਕਰਕੇ ਪਰਚਾ ਦਰਜ ਕਰ ਲਿਆ ਗਿਆ ਸੀ ਤੇ ਉਸਨੂੰ ਜੇਲ੍ਹ 'ਚ ਭੇਜਿਆ ਗਿਆ | ਉਨ੍ਹਾਂ ਵਾਇਰਲ ਹੋਈ ਵੀਡੀਓ 'ਚ ਔਰਤਾਂ ਵਲੋਂ ਪਿਸਤੌਲ ਕੱਢੇ ਜਾਣ ਦਾ ਘਟਨਾ ਤੋਂ ਇਨਕਾਰ ਕਰਦਿਆਂ ਕਿਹਾ ਕਿ ਇਸ ਘਟਨਾ 'ਚ ਪਿਸਤੌਲ ਨਹੀਂ ਕੱਢਿਆ ਗਿਆ ਹੈ ਅਤੇ ਮੁਲਜ਼ਮ ਤੋਂ ਕੀਤੀ ਜਾਂਚ 'ਚ ਪਿਸਤੌਲ ਹੋਣਾ ਨਹੀਂ ਪਾਇਆ ਗਿਆ | ਜਦੋਂ ਕਿ ਪੀੜਤ ਧਿਰ ਅਰਾਧਨਾ ਦੇ ਪਰਿਵਾਰ ਦਾ ਕੋਈ ਵੀ ਮੈਂਬਰ ਜ਼ਖ਼ਮੀਂ ਨਹੀਂ ਹੋਇਆ ਤੇ ਨਾਂ ਹੀ ਹਸਪਤਾਲ ਭਰਤੀ ਹੈ | ਉਨ੍ਹਾਂ ਕਿਹਾ ਕਿ ਫਿਰ ਵੀ ਜੇਕਰ ਪੀੜਤ ਧਿਰ ਪੁਲਿਸ ਨੂੰ ਮੈਡੀਕਲ ਦੀ ਦਰਖਾਸਤ ਦੇਵੇ ਜਾ ਖੁਦ ਬਿਆਨ ਦੇਵੇ ਤਾਂ ਉਹ ਇਸ ਮਾਮਲੇ 'ਚ ਹੋਰ ਉਚਿਤ ਕਾਰਵਾਈ ਅਮਲ 'ਚ ਲਿਆਉਣਗੇ |
