ਰਾਜਪੁਰਾ, 26 ਸਤੰਬਰ (ਜੀ.ਪੀ. ਸਿੰਘ)-ਲੰਘੇ ਦਿਨ ਰਾਜਪੁਰਾ-ਸਰਹਿੰਦ ਮੁੱਖ ਰੇਲ ਮਾਰਗ ’ਤੇ ਰੇਲਵੇ ਦੀਆਂ ਲਾਈਨਾਂ ਪਾਰ ਕਰਦਿਆਂ ਰੇਲ ਗੱਡੀ ਦੀ ਲਪੇਟ ’ਚ ਆਉਣ ਕਾਰਨ ਇਕ ਅਣਪਛਾਤੀ ਔਰਤ ਦੀ ਮੌਤ ਹੋ ਗਈ। ਰੇਲਵੇ ਪੁਲਿਸ ਨੇ ਮ੍ਰਿਤਕ ਔਰਤ ਦੀ ਲਾਸ਼ ਨੂੰ ਸਥਾਨਕ ਸਿਵਲ ਹਸਪਤਾਲ ਦੇ ਮੁਰਦਾਘਰ ਵਿਚ ਸ਼ਨਾਖ਼ਤ ਲਈ ਰੱਖਵਾ ਦਿੱਤਾ ਹੈ। ਰੇਲਵੇ ਪੁਲਿਸ ਚੋਂਕੀ ਰਾਜਪੁਰਾ ਦੇ ਸਹਾਇਕ ਥਾਣੇਦਾਰ ਗੁਲਾਬ ਸਿੰਘ ਨੇ ਦੱਸਿਆ ਕਿ ਸਥਾਨਕ ਰੇਲਵੇ ਦੇ ਸਟੇਸ਼ਨ ਮਾਸਟਰ ਤੋਂ ਇਤਲਾਹ ਮਿਲੀ ਕਿ ਇਕ ਔਰਤ ਦੀ ਲਾਸ਼ ਰਾਜਪੁਰਾ-ਸਰਹਿੰਦ ਰੇਲ ਮਾਰਗ ਦੇ ਕੰਢੇ ਪਿੰਡ ਫਰੀਦਪੁਰ ਨੇੜੇ ਪਈ ਹੈ। ਜਿਸ ਤੇ ਰੇਲਵੇ ਪੁਲਿਸ ਨੇ ਮੋਕੇ ਤੇ ਪਹੁੰਚ ਕੇ ਲਾਸ਼ ਨੂੰ ਆਪਣੇ ਕਬਜੇ ਵਿਚ ਲੈ ਲਿਆ। ਉਹਨਾਂ ਦੱਸਿਆ ਕਿ ਮ੍ਰਿਤਕ ਔਰਤ ਦੀ ਉਮਰ 40-45 ਸਾਲ ਦੀ ਜਾਪਦੀ ਹੈ ਤੇ ਉਸ ਨੇ ਨੀਲੀਆਂ ਧਾਰੀਆਂ ਵਾਲਾ ਸਫੇਦ ਕੁੜਤਾ ਅਤੇ ਚਾਕਲੇਟੀ ਪਜਾਮੀ ਪਹਿਣੀ ਹੋਈ ਹੈ। ਮ੍ਰਿਤਕਾ ਦੀ ਪਹਿਚਾਣ ਨਹੀਂ ਹੋ ਸਕੀ, ਇਸ ਲਈ ਲਾਸ਼ ਨੂੰ ਸਥਾਨਕ ਸਿਵਲ ਹਸਪਤਾਲ ਦੇ ਮੁਰਦਾਘਰ ਵਿਚ 72 ਘੰਟਿਆਂ ਲਈ ਸ਼ਨਾਖ਼ਤ ਲਈ ਰੱਖਵਾ ਦਿੱਤਾ ਹੈ।
