ਰੱਤੇਵਾਲ, 22 ਫਰਵਰੀ (ਅਸ਼ੋਕ ਕੁਮਾਰ ਲੀਲ) - ਰੱਤੇਵਾਲ-ਬਲਾਚੌਰ ਲਿੰਕ ਰੋਡ 'ਤੇ ਬਰੇਤਾ ਨਜ਼ਦੀਕ ਸੜਕ ਛੱਪੜ ਦਾ ਰੂਪ ਧਾਰਨ ਕਰ ਚੁੱਕੀ ਹੈ | ਇਹ ਰੋਡ 15-20 ਪਿੰਡਾਂ ਨੂੰ ਬਲਾਚੌਰ ਨਾਲ ਜੋੜਦਾ ਹੈ | ਇਸ ਰੋਡ ਦੀ ਹਾਲਤ ਇੰਨੀ ਖਸਤਾ ਹੋ ਚੁੱਕੀ ਹੈ ਕਿ 10-15 ਮਿੰਟ ਦਾ ਰਸਤਾ ਅੱਧੇ ਪੌਣੇ ਘੰਟੇ ਦਾ ਸਫਰ ਬਣ ਜਾਂਦਾ ਹੈ | ਐਮਰਜੈਂਸੀ ਵਿੱਚ ਜੇਕਰ ਕੋਈ ਮਰੀਜ਼ ਲੈ ਕੇ ਜਾਣਾ ਹੋਵੇ ਤਾਂ ਬਾਇਆ ਕਾਠਗੜ੍ਹ ਲੈ ਕੇ ਜਾਣਾ ਪੈਂਦਾ ਹੈ ਕਿਉਂਕਿ ਇਸ ਰੋਡ ਦੀ ਹਾਲਤ ਇੰਨੀ ਖਸਤਾ ਹੋ ਚੁੱਕੀ ਹੈ ਕਿ ਥਾਂ-ਥਾਂ 'ਤੇ ਟੋਏ ਨਹੀਂ ਵੱਡੇ-ਵੱਡੇ ਖੱਡੇ ਬਣ ਚੁੱਕੇ ਹਨ ਅਤੇ ਬਰੇਤਾ ਦੇ ਘਰੇਲੂ ਪਾਣੀ ਦਾ ਕੋਈ ਹੱਲ ਨਾ ਹੋਣ ਕਾਰਨ ਇਹ ਖੱਡੇ ਛੱਪੜਾਂ ਦਾ ਰੂਪ ਧਾਰਨ ਕਰ ਚੁੱਕੇ ਹਨ | ਜਿਸ ਕਾਰਨ ਆਉਣ ਜਾਣ ਵਾਲੇ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਭਰੋਸੇਯੋਗ ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਇਹ ਰੋਡ ਵੀ ਜਲਦ ਬਣਨ ਵਾਲਾ ਹੈ ਪ੍ਰੰਤੂ ਇੱਥੋਂ ਦੇ ਵਸਨੀਕਾਂ ਦੇ ਘਰੇਲੂ ਪਾਣੀ ਦਾ ਨਿਕਾਸ ਨਾ ਹੋਣ ਕਾਰਨ ਸਾਰਾ ਪਾਣੀ ਰੋਡ 'ਤੇ ਹੀ ਖੜਦਾ ਹੈ | ਜਿਸ ਕਾਰਨ ਇਹ ਰੋਡ ਹੁਣ ਛੱਪੜ ਦਾ ਰੂਪ ਧਾਰਨ ਕਰ ਚੁੱਕਾ ਹੈ | ਪ੍ਰਸ਼ਾਸਨ ਅਤੇ ਸਰਕਾਰ ਨੂੰ ਇਸ ਮਸਲੇ ਨੂੰ ਗੰਭੀਰਤਾ ਨਾਲ ਹੱਲ ਕਰਨ ਦੀ ਲੋੜ ਹੈ | ਕਿਉਂਕਿ ਸਕੂਲੀ ਬੱਚਿਆਂ ਅਤੇ ਆਮ ਪਬਲਿਕ ਨੂੰ ਰੋਜ਼ਾਨਾ ਇਸ ਗੰਭੀਰ ਸਮੱਸਿਆ ਨਾਲ ਜੂਝਣਾ ਪੈਂਦਾ ਹੈ |
