ਦੂਜਿਆਂ ਦੇ ਭਲੇ ਲਈ ਪਰਉਪਕਾਰ ਦੇ ਕਾਰਜ ਕਰਨੇ ਹੀ ਸੱਚੀ ਸੇਵਾ ਹੈ-ਜਸਵੀਰ ਸਿੰਘ ਗੜ੍ਹੀ

ਧਾਮ ਰਕਬਾ ਵਿਖੇ ਅਚਾਰਿਆ ਚੇਤਨਾਨੰਦ ਜੀ ਦੀ ਸਰਪ੍ਰਸਤੀ ਹੇਠ ਨਵੇਂ ਵਰ੍ਹੇ ਦੀ ਆਮਦ 'ਤੇ ਧਾਰਮਿਕ ਸਮਾਗਮ
ਮੁੱਲਾਂਪੁਰ-ਦਾਖਾ, 1 ਜਨਵਰੀ (ਨਿਰਮਲ ਸਿੰਘ ਧਾਲੀਵਾਲ)-ਨਵੇਂ ਸਾਲ ਦੀ ਆਮਦ 'ਤੇ ਭੂਰੀ ਵਾਲੇ ਗੁਰਗੱਦੀ ਪ੍ਰੰਪਰਾ ਗਰੀਬਦਾਸੀ ਸੰਪਰਦਾਇ ਨਾਲ ਜੁੜੀ ਸੰਗਤ ਵਲੋਂ ਸ੍ਰੀ ਲਾਲਪੁਰੀ ਕੁਟੀਆ ਧਾਮ ਰਕਬਾ ਨੇੜੇ ਮੰਡੀ ਮੁੱਲਾਂਪੁਰ ਦਾਖਾ (ਲੁਧਿ:) ਵਿਖੇ ਧਾਰਮਿਕ ਸਮਾਗਮ ਕਰਵਾਇਆ ਗਿਆ | ਭੂਰੀਵਾਲੇ ਗੁਰਗੱਦੀ ਪ੍ਰੰਪਰਾ (ਗਰੀਬਦਾਸੀ ਸੰਪਰਦਾਇ) ਦੇ ਵਰਤਮਾਨ ਗੱਦੀਨਸ਼ੀਨ ਵੇਦਾਂਤ ਅਚਾਰੀਆ ਸਵਾਮੀ ਚੇਤਨਾ ਨੰਦ ਜੀ ਭੂਰੀ ਵਾਲਿਆਂ ਵਲੋਂ 'ਜਗਤਗੁਰੂ ਅਚਾਰੀਆ ਬਾਬਾ ਗਰੀਬਦਾਸ ਰਚਿਤ ਬਾਣੀ' ਦੇ ਭੋਗ ਪਾਉਣ ਉਪਰੰਤ ਸਵਾਮੀ ਜੀ ਵਲੋਂ ਸੰਗਤ ਨੂੰ ਉਪਦੇਸ਼ ਦਿੰਦਿਆਂ ਕਿਹਾ ਕਿ ਨਿਰਸਵਾਰਥ ਸੇਵਾ, ਸਿਮਰਨ, ਦਾਨ ਕਰਨ ਨਾਲ ਹਰ ਇੱਛਾ ਸਹਿਜੇ ਹੀ ਪੂਰੀ ਹੋ ਜਾਂਦੀ ਹੈ | ਅਚਾਰੀਆ ਜੀ ਨੇ ਕਿਹਾ ਕਿ ਸ਼ਿ੍ਸ਼ਟੀ ਦੇ ਕਣ-ਕਣ 'ਚ ਪ੍ਰਮਾਤਮਾ ਬਿਰਾਜਮਾਨ ਹੈ ਲੇਕਿਨ ਪ੍ਰਮਾਤਮਾ ਦੀ ਜੋਤ 'ਨਾਮ ਸ਼ਬਦ' ਦੀ ਕਮਾਈ ਨਾਲ ਹੀ ਪ੍ਰਗਟ ਹੋ ਸਕਦੀ ਹੈ | ਉਨ੍ਹਾਂ ਦੱਸਿਆ ਕਿ ਤੀਰਥ ਸਥਾਨਾਂ 'ਤੇ ਜਾਣ ਨਾਲ ਪੁੰਨਾਂ ਦੀ ਪ੍ਰਾਪਤੀ ਹੋ ਸਕਦੀ ਹੈ, ਪ੍ਰੰਤੂ ਸਦਗਤੀ ਨਹੀਂ, ਸਦਗਤੀ ਸਿਰਫ਼ 'ਨਾਮ ਸ਼ਬਦ' ਦੇ ਨਿਰੰਤਰ ਜਾਪ, ਨਿਰਸਵਾਰਥ ਸੇਵਾ, ਸਿਮਰਨ ਦਾਨ ਨਾਲ ਹੀ ਹੋ ਸਕਦੀ ਹੈ | ਇਸ ਮੌਕੇ ਉਚੇਚਾ ਪਹੁੰਚੇ ਪੰਜਾਬ ਰਾਜ ਐੱਸ.ਸੀ ਕਮਿਸ਼ਨ ਦੇ ਚੇਅਰਮੈਨ ਜਸਵੀਰ ਸਿੰਘ ਗੜ੍ਹੀ ਕੁਟੀਆ ਭੂਰੀ ਵਾਲੇ ਰਕਬਾ ਵਿਖੇ ਨਤਮਸਤਕ ਹੋਣ ਉਪਰੰਤ ਜੁੜੀ ਸੰਗਤ ਵਿਚ ਬਿਰਾਜਮਾਨ ਹੋਏ | ਧਾਰਮਿਕ ਮੰਚ ਤੋਂ ਸੰਬੋਧਨ ਸਮੇਂ ਚੇਅਰਮੈਨ ਜਸਵੀਰ ਸਿੰਘ ਗੜ੍ਹੀ ਨੇ ਕਿਹਾ ਕਿ ਗੁਰਗੱਦੀ ਪ੍ਰੰਪਰਾ ਭੂਰੀ ਵਾਲੇ ਸੰਪਰਦਾਇ ਦੇ ਮੌਜੂਦਾ ਗੱਦੀਨਸ਼ੀਨ ਵੇਦਾਂਤ ਅਚਾਰੀਆ ਸਵਾਮੀ ਸ੍ਰੀ ਚੇਤਨਾ ਨੰਦ ਜੀ ਵਲੋਂ ਅਧਿਆਤਮਿਕ ਗਿਆਨ ਵੰਡਣ ਦੇ ਨਾਲ ਲੋੜਵੰਦਾਂ ਲਈ ਸਿੱਖਿਆ ਅਤੇ ਸਿਹਤ ਸੇਵਾਵਾਂ ਵਿਚ ਵੱਡਮੁੱਲਾ ਯੋਗਦਾਨ ਸ਼ਲਾਘਾਯੋਗ ਹੈ | ਉਨ੍ਹਾਂ ਕਿਹਾ ਕਿ ਗੁਰੂ ਉਪਦੇਸ਼ ਅੁਨਸਾਰ ਦੂਜਿਆਂ ਦੇ ਭਲੇ ਲਈ ਪਰ-ਉਪਕਾਰ ਦੇ ਕਾਰਜ ਕਰਨੇ ਹੀ ਸੱਚੀ ਸੇਵਾ ਹੈ | ਇਸ ਸਮੇਂ ਅਚਾਰੀਆ ਚੇਤਨਾ ਨੰਦ ਜੀ ਵਲੋਂ ਚੇਅਰਮੈਨ ਜਸਵੀਰ ਸਿੰਘ ਗੜ੍ਹੀ ਦਾ ਸਨਮਾਨ ਕੀਤਾ ਗਿਆ | ਸ੍ਰੀ ਲਾਲਪੁਰੀ ਕੁਟੀਆ ਧਾਮ ਰਕਬਾ ਵਿਖੇ ਧਾਰਮਿਕ ਸਮਾਗਮ ਸਮੇਂ ਪ੍ਰਧਾਨ ਸੁਰਿੰਦਰ, ਸਰਪੰਚ ਮਨਮੀਤ ਸਹਿਜਪਾਲ, ਡਾ: ਜਸਪਾਲ ਸਿੰਘ, ਮਲਕੀਤ ਸਿੰਘ, ਵਿਜੇ ਬਾਂਸਲ ਮੰਡੀ ਮੁੱਲਾਂਪੁਰ, ਕੌਂਸਲ ਬਲਬੀਰ ਚੰਦ ਬੀਰਾ, ਚਰਨਦਾਸ ਅਗਰਵਾਲ, ਬਲਵੀਰ ਸਿੰਘ ਹੋਰਨਾਂ ਸਮੇਤ ਵੱਡੀ ਗਿਣਤੀ ਸੰਗਤ ਮੌਜੂਦ ਸੀ |