ਸ੍ਰੀ ਮੁਕਤਸਰ ਸਾਹਿਬ, 24 ਸਤੰਬਰ (ਰਣਜੀਤ ਸਿੰਘ ਢਿੱਲੋਂ)-ਗ੍ਰਾਮ ਪੰਚਾਇਤ ਪਿੰਡ ਚੜੇਵਾਨ ਦਾ ਵਫ਼ਦ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਪਹੁੰਚੇ ਕੇਂਦਰ ਸਰਕਾਰ ਦੇ ਰੇਲਵੇ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੂੰ ਮਿਲਿਆ ਅਤੇ ਮੰਗ ਪੱਤਰ ਸੌਂਪਿਆ, ਜਿਸ ਵਿਚ ਮੰਗ ਕੀਤੀ ਗਈ ਕਿ ਪਿੰਡ ਚੜੇਵਾਨ ਦਾ 22-ਸੀ ਫਾਟਕ ਲੰਮੇ ਸਮੇਂ ਤੋਂ ਬੰਦ ਕਰ ਦਿੱਤਾ ਗਿਆ ਸੀ, ਜਦਕਿ ਬਹੁਤ ਸਮਾਂ ਪਹਿਲਾਂ ਇਹ ਚੱਲਦਾ ਰਿਹਾ ਹੈ | ਇਹ 5-6 ਪਿੰਡਾਂ ਸੰਗਰਾਣਾ, ਮੜ੍ਹਮੱਲੂ, ਚੌਂਤਰਾ, ਚੜੇਵਾਨ ਆਦਿ ਨੂੰ ਜੋੜਦਾ ਹੈ | ਇਸ ਦੇ ਬੰਦ ਹੋਣ ਕਾਰਨ ਆਉਣ-ਜਾਣ ਵਾਲਿਆਂ ਨੂੰ ਬਹੁਤ ਸਮੱਸਿਆ ਆਉਂਦੀ ਹੈ | ਵਫ਼ਦ ਦੇ ਮੈਂਬਰਾਂ ਨੇ ਦੱਸਿਆ ਕਿ ਰਵਨੀਤ ਸਿੰਘ ਬਿੱਟੂ ਨੇ ਬਹੁਤ ਧਿਆਨ ਨਾਲ ਮੁਸ਼ਕਿਲ ਨੂੰ ਸੁਣਿਆ ਅਤੇ ਕਿਹਾ ਕਿ ਇਸ ਦਾ ਢੁਕਵਾਂ ਹੱਲ ਕੱਢਿਆ ਜਾਵੇਗਾ | ਅੰਡਰਬਿ੍ਜ ਬਣਾਉਣ ਸੰਬੰਧੀ ਵੀ ਵਿਚਾਰ ਕੀਤਾ ਜਾਵੇਗਾ | ਇਸ ਵਫ਼ਦ ਵਿਚ ਸਰਪੰਚ ਅਮਨਜੀਤ ਕੌਰ ਬੁੱਟਰ, ਨਿਰਭੈ ਸਿੰਘ ਬੁੱਟਰ, ਪੰਚਾਇਤ ਮੈਂਬਰ ਗੁਰਜੀਤ ਸਿੰਘ, ਬਲਦੇਵ ਸਿੰਘ, ਕੁਲਦੀਪ ਕੌਰ ਪਤਨੀ ਸੁਖਵਿੰਦਰ ਸਿੰਘ, ਸਾਬਕਾ ਸਰਪੰਚ ਗੁਰਵੰਤ ਸਿੰਘ ਮਨੇਸ, ਮਿਲਕਫ਼ੈੱਡ ਫ਼ਰੀਦਕੋਟ ਦੇ ਸਾਬਕਾ ਡਾਇਰੈਕਟਰ ਰਮੇਸ਼ ਕੁਮਾਰ ਪੱਪੀ ਬਜਾਜ, ਦਲੇਰ ਸਿੰਘ ਮਨੇਸ ਆਦਿ ਹਾਜ਼ਰ ਸਨ |
