ਸ਼ਹਿਣਾ, 2 ਸਤੰਬਰ (ਸੁਰੇਸ਼ ਗੋਗੀ)-ਪਾਵਰਕਾਮ ਦਫ਼ਤਰ ਸ਼ਹਿਣਾ ਵਿਖੇ ਮੀਂਹ ਦੇ ਪਾਣੀ ਨਾਲ ਮੁਲਾਜ਼ਮਾਂ ਦਾ ਬੁਰਾ ਹਾਲ ਹੋ ਰਿਹਾ ਹੈ | ਦਫ਼ਤਰ ਵਿਚ ਕੰਮ ਕਰਦੇ ਮੁਲਾਜ਼ਮਾਂ ਨੇ ਦੱਸਿਆ ਕਿ ਪਾਵਰਕਾਮ ਦਾ ਦਫ਼ਤਰ ਸੜਕ ਤੋਂ 4 ਫੱੁਟ ਨੀਵਾਂ ਹੋਣ ਕਾਰਨ ਪਾਣੀ ਅਕਸਰ ਜਮ੍ਹਾ ਹੋ ਜਾਂਦਾ ਹੈ ਪਰ ਬੀਤੇ ਤਿੰਨ ਦਿਨ ਤੋਂ ਪੈ ਰਹੇ ਮੀਂਹ ਨਾਲ ਸਾਰੀਆਂ ਛੱਤਾਂ ਚੋਣ ਲੱਗ ਪਈਆਂ ਹਨ, ਕਿਉਂਕਿ ਦਫ਼ਤਰ ਦੀ ਇਮਾਰਤ ਪੁਰਾਣੀ ਹੋਣ ਕਾਰਨ ਖਸਤਾ ਹਾਲਤ ਹੋ ਚੱੁਕੀ ਹੈ | ਉਨ੍ਹਾਂ ਦੱਸਿਆ ਕਿ ਛੱਤ 'ਤੋਂ ਸਿੰਮਦੇ ਪਾਣੀ ਨਾਲ ਕੰਪਿਊਟਰ ਅਤੇ ਹੋਰ ਰਿਕਾਰਡ ਖ਼ਰਾਬ ਹੋ ਰਿਹਾ ਹੈ | ਜਿਸ ਨੂੰ ਭਾਵੇਂ ਕਿ ਪੋਲੀਥੀਨ ਦੀ ਮਦਦ ਨਾਲ ਢਕ ਕੇ ਰੱਖਣ ਦਾ ਯਤਨ ਕੀਤਾ ਜਾ ਰਿਹਾ ਹੈ ਪਰ ਕੰਧਾਂ ਨੂੰ ਛੱਤ ਤੋਂ ਸਿੰਮਦੇ ਪਾਣੀ ਨਾਲ ਸਲਾਬ ਚੜ੍ਹ ਚੱੁਕੀ ਹੈ ਅਤੇ ਕਿਤਾਬਾਂ ਤੇ ਫਾਈਲਾਂ ਪਾਣੀ ਨਾਲ ਭਿੱਜ ਚੁੱਕੀਆਂ ਹਨ | ਉਨ੍ਹਾਂ ਕਿਹਾ ਕਿ ਕਦੇ ਵੀ ਦਫ਼ਤਰ ਵਿਚ ਅਣਸੁਖਾਂਵੀ ਘਟਨਾ ਵਾਪਰ ਸਕਦੀ ਹੈ |
