ਭਵਾਨੀਗੜ, 4 ਦਸੰਬਰ (ਰਣਧੀਰ ਸਿੰਘ ਫੱਗੂਵਾਲਾ) - ਪਿੰਡ ਚੰਨੋਂ ਨੇੜੇ ਉਸ ਸਮੇਂ ਭਗਦੜ ਮੱਚ ਗਈ, ਜਦੋਂ ਇੱਕ ਨਿੱਜੀ ਕੰਪਨੀ ਦੀ ਬੱਸ ਜੋ ਚੰਡੀਗੜਤੋਂ ਬਠਿੰਡਾ ਨੂੰ ਜਾ ਰਹੀ ਸੀ, ਨੂੰ ਅੱਗ ਲੱਗ ਜਾਣ ਕਾਰਨ ਬੱਸ ਸੜ ਕੇ ਸਵਾਹ ਹੋ ਗਈ, ਪਰ ਉਸ ਵਿਚ ਚੜੀਆਂ 25 ਦੇ ਕਰੀਬ ਸਵਾਰੀਆਂ ਅਤੇ ਬੱਸ ਅਮਲਾ ਵਾਲ-ਵਾਲ ਬਚ ਗਿਆ | ਇਸ ਸਬੰਧੀ ਪ੍ਰਤੱਖ ਦਰਸੀਆਂ ਨੇ ਦੱਸਿਆ ਕਿ ਚੰਡੀਗੜਤੋਂ ਬਠਿੰਡਾ ਨੂੰ ਜਾ ਰਹੀ ਔਰਬਿਟ ਕੰਪਨੀ ਦੀ ਬੱਸ ਜਦੋਂ ਪਿੰਡ ਚੰਨੋਂ ਨੇੜੇ ਸਥਿਤ ਸ਼ਰਮਾ ਵੈਸ਼ਨੂੰ ਢਾਬੇ ਕੋਲ ਪਹੁੰਚੀ ਤਾਂ ਡਰਾਈਵਰ ਨੂੰ ਬੱਸ ਵਿਚੋਂ ਧੂੰਆਂ ਨਿਕਲਦਾ ਦੇਖਿਆ ਤਾਂ ਉਸ ਨੇ ਬੱਸ ਰੋਕ ਕੇ ਸਵਾਰੀਆਂ ਅਤੇ ਉਨਾਂ ਦੇ ਸਮਾਨ ਨੂੰ ਬਾਹਰ ਕੱਢਦਿਆਂ ਬੱਸ ਵਿਚ ਰੱਖੇ ਅੱਗ ਬੁਝਾਊ ਯੰਤਰਾਂ ਨਾਲ ਜਿੱਥੋਂ ਧੂੰਆਂ ਨਿਕਲਦਾ ਸੀ, ਉਥੇ ਅੱਗ ਰੋਕੂ ਸਪਰੇਅ ਕਰ ਦਿੱਤੀ, ਇਸ ਦੌਰਾਨ ਹੀ ਬੱਸ ਵਿਚੋਂ ਅੱਗ ਬੁਝਣ ਦੀ ਬਿਜਾਏ ਭੜਕ ਗਈ, ਜਿਸ 'ਤੇ ਲੋਕਾਂ ਨੇ ਅੱਗ ਬੁਝਾਉਣ ਦੇ ਯਤਨ ਕਰਦਿਆਂ ਹੀ ਬੱਸ ਲਟ-ਲਟ ਕਰ ਕੇ ਮੱਚਣ ਲੱਗੀ | ਇਸ ਦੀ ਸੂਚਨਾ ਅੱਗ ਬੁਝਾਊ ਗੱਡੀ ਨੂੰ ਦਿੱਤੀ, ਪਰ ਗੱਡੀ ਦੇ ਆਉਣ ਤੱਕ ਬੱਸ ਪੂਰੀ ਤਰਾਂ ਸੜ ਕੇ ਸਵਾਹ ਹੋ ਗਈ, ਬੱਸ ਵਿਚ ਕਰੀਬ 2 ਦਰਜਨ ਸਵਾਰੀਆਂ ਅਤੇ ਬੱਸ ਅਮਲਾ ਵਾਲ-ਵਾਲ ਬਚ ਗਿਆ | ਇਸ ਸਬੰਧੀ ਪਸਿਆਣਾ ਪੁਲਿਸ ਚੌਂਕੀ ਦੇ ਇੰਚਾਰਜ ਅਮਨਪਾਲ ਸਿੰਘ ਵਿਰਕ ਨਾਲ ਗੱਲ ਕਰਨ 'ਤੇ ਉਨਾਂ ਦੱਸਿਆ ਕਿ ਔਰਬਿਟ ਕੰਪਨੀ ਦੀ ਬੱਸ ਨੂੰ ਅੱਗ ਲੱਗਣ ਦੀ ਘਟਨਾ ਵਾਪਰੀ ਹੈ, ਬੱਸ ਵਿਚ ਚੜੀਆਂ 25 ਸਵਾਰੀਆਂ ਅਤੇ ਬੱਸ ਅਮਲਾ ਪੂਰੀ ਤਰਾਂ ਸੁਰੱਖਿਅਤ ਹੈ | ਉਨਾਂ ਦੱਸਿਆ ਕਿ ਪੁਲਿਸ ਵਲੋਂ ਇਸ ਸਬੰਧੀ ਕਾਰਵਾਈ ਕੀਤੀ ਜਾ ਰਹੀ ਹੈ |
