ਅਬੋਹਰ, 31 ਮਈ (ਵਿਵੇਕ ਹੂੜੀਆ)- ਅਬੋਹਰ ਦੀ ਅਨਾਰ ਗਲੀ 'ਚ 2 ਨੌਜਵਾਨਾਂ ਨੇ ਬੜੀ ਚਲਾਕੀ ਨਾਲ ਇੱਕ ਗੁਦਾਮ 'ਚ ਉਤਾਰੇ ਜਾ ਰਹੇ ਸੁੱਕੇ ਮੇਵੇ ਦੀ ਬੋਰੀ 'ਚੋਂ 1 ਮਗ਼ਜ਼ਾਂ ਦਾ ਗੱਟਾ ਗ਼ਾਇਬ ਕਰ ਦਿੱਤਾ | ਜਦੋਂ ਦੂਜਾ ਗੱਟਾ ਉਤਾਰਨ ਲੱਗੇ ਤਾਂ ਪਿਕਅਪ ਚਾਲਕ ਨੇ ਇਕ ਨੌਜਵਾਨ ਕਾਬੂ ਕਰ ਲਿਆ | ਜਦੋਂ ਕਿ ਉਸ ਦਾ ਦੂਜਾ ਸਾਥੀ ਮੋਟਰਸਾਈਕਲ ਲੈ ਕੇ ਫ਼ਰਾਰ ਹੋ ਗਿਆ | ਰੌਲਾ ਸੁਣ ਕੇ ਆਲੇ-ਦੁਆਲੇ ਦੇ ਲੋਕ ਇਕੱਠੇ ਹੋ ਗਏ ਅਤੇ 112 ਪੁਲਿਸ ਹੈਲਪ ਲਾਈਨ 'ਤੇ ਇਸ ਦੀ ਸੂਚਨਾ ਦਿੱਤੀ, ਜਿਸ 'ਤੇ ਪੁਲਿਸ ਨੇ ਮੌਕੇ 'ਤੇ ਆ ਕੇ ਇੱਕ ਨੌਜਵਾਨ ਨੂੰ ਹਿਰਾਸਤ ਵਿਚ ਲੈ ਲਿਆ | ਫੜੇ ਗਏ ਨੌਜਵਾਨ ਦੀ ਪਛਾਣ ਚਮਕੀਲਾ ਨਾਮਕ ਨੌਜਵਾਨ ਵਜੋਂ ਹੋਈ ਹੈ | ਜੋ ਕਿ ਈਦਗਾਹ ਬਸਤੀ ਦਾ ਰਹਿਣ ਵਾਲਾ ਹੈ | ਇੱਥੇ ਥਾਣਾ ਇੰਚਾਰਜ ਮਨਿੰਦਰ ਸਿੰਘ ਨੇ ਕਿਹਾ ਕਿ ਗਿ੍ਫ਼ਤਾਰ ਨੌਜਵਾਨ ਤੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ ਜਾਵੇਗੀ, ਜਿਸ ਨਾਲ ਹੋਰ ਚੋਰੀਆਂ ਦਾ ਵੀ ਖ਼ੁਲਾਸਾ ਹੋਵੇਗਾ | ਉਨ੍ਹਾਂ ਕਿਹਾ ਕਿ ਚਮਕੀਲਾ ਖ਼ਿਲਾਫ਼ ਪਹਿਲਾਂ ਵੀ ਕਈ ਮਾਮਲੇ ਦਰਜ ਹਨ | ਦੱਸਿਆ ਜਾ ਰਿਹਾ ਹੈ ਕਿ ਹਾਲ ਹੀ ਵਿਚ ਉਸ ਨੇ ਗੰਗਾਨਗਰ ਰੋਡ ਤੋਂ ਬਦਾਮ ਦਾ ਇੱਕ ਥੈਲਾ ਵੀ ਚੋਰੀ ਕੀਤਾ ਸੀ |
