ਲੰਡਨ, 15 ਨਵੰਬਰ (ਪੀ.ਟੀ.ਆਈ.)-ਕੇਨਸਿੰਗਟਨ ਪੈਲੇਸ ਨੇ ਐਤਵਾਰ ਨੂੰ ਕਿਹਾ ਕਿ ਬ੍ਰਿਟੇਨ ਦੇ ਪ੍ਰਿੰਸ ਵਿਲੀਅਮ ਅਤੇ ਉਨ੍ਹਾਂ ਦੀ ਪਤਨੀ ਕੇਟ ਮਿਡਲਟਨ ਅਗਲੇ ਹਫ਼ਤੇ ਮੁੰਬਈ ਦਾ ਦੌਰਾ ਕਰਨਗੇ। ਇਸ ਦੌਰੇ ਦੌਰਾਨ, ਉਹ 2026 ਅਰਥਸ਼ਾਟ ਇਨਾਮ ਜੇਤੂਆਂ ਦੇ ਨਾਵਾਂ ਦਾ ਐਲਾਨ ਕਰਨਗੇ। ਛੇ ਸਾਲ ਪਹਿਲਾਂ ਸ਼ਾਹੀ ਪਰਿਵਾਰ ਵਲੋਂ ਸ਼ੁਰੂ ਕੀਤਾ ਗਿਆ ਸਾਲਾਨਾ ਪੁਰਸਕਾਰ, ਦੁਨੀਆ ਦੇ ਪ੍ਰਮੁੱਖ ਵਾਤਾਵਰਣ ਇਨਾਮਾਂ ਵਿਚੋਂ ਇੱਕ ਹੈ।
ਪੰਜ ਫਾਈਨਲਿਸਟਾਂ ਵਿਚੋਂ ਹਰੇਕ ਨੂੰ 1 ਮਿਲੀਅਨ ਪੌਂਡ (ਲਗਭਗ 1.3 ਮਿਲੀਅਨ ਅਮਰੀਕੀ ਡਾਲਰ) ਦਾ ਇਨਾਮ ਮਿਲਦਾ ਹੈ। ਪ੍ਰਿੰਸ ਅਤੇ ਪ੍ਰਿੰਸੈਸ ਆਫ਼ ਵੇਲਜ਼ ਦੀ ਟੀਮ ਨੇ ਕਿਹਾ ਕਿ ਇਸ ਸਾਲ ਦਾ ਪੁਰਸਕਾਰ ਸਮਾਰੋਹ, ਮੰਗਲਵਾਰ ਨੂੰ ਮੁੰਬਈ ਵਿਚ ਹੋਣ ਵਾਲਾ, ਭਾਰਤ ਦੇ 24 ਸੂਬਿਆਂ ਦੇ 15,000 ਸਕੂਲਾਂ ਨਾਲ ਜੁੜਨ ਤੋਂ ਬਾਅਦ, ਹੁਣ ਤੱਕ ਦਾ “ਸਭ ਤੋਂ ਵੱਡਾ” ਸਮਾਗਮ ਹੋਣ ਜਾ ਰਿਹਾ ਹੈ। “ਰਾਜਕੁਮਾਰ ਅਤੇ ਰਾਜਕੁਮਾਰੀ ਸੋਮਵਾਰ, 16 ਨਵੰਬਰ ਅਤੇ ਬੁੱਧਵਾਰ, 18 ਨਵੰਬਰ ਦੇ ਵਿਚਕਾਰ ਮੁੰਬਈ ਵਿਚ ਕਈ ਸਮਾਗਮਾਂ ’ਚ ਹਿੱਸਾ ਲੈਣਗੇ।
ਇਹ ਸਮਾਗਮ ਨਵੀਨਤਾ, ਸਥਿਰਤਾ, ਯੁਵਾ ਲੀਡਰਸ਼ਿਪ ਅਤੇ ਯੂਨਾਈਟਿਡ ਕਿੰਗਡਮ ਅਤੇ ਭਾਰਤ ਵਿਚਕਾਰ ਡੂੰਘੇ ਸਬੰਧਾਂ ਦਾ ਜਸ਼ਨ ਮਨਾਉਣਗੇ।” ਦੁਨੀਆ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਹਰ ਸਾਲ ਕਰਵਾਏ ਜਾਣ ਵਾਲੇ ਇਸ ਪੁਰਸਕਾਰ ਸਮਾਰੋਹ ਵਿਚ ਪੰਜ ਜੇਤੂਆਂ ਦਾ ਐਲਾਨ ਕੀਤਾ ਜਾਂਦਾ ਹੈ ਅਤੇ ਇਸ ਸਾਲ ਭਾਰਤ ਨੂੰ ਚੁਣਿਆ ਗਿਆ ਹੈ।
